ԵՐԵՎԱՆ, 17 ՀՈՒՆԻՍԻ, ԱՐՄԵՆՊՐԵՍ: Արգենտինայի ձեռնարկատեր կանանց «Pollera Pantalon» նախաձեռնության անդամները հունիսի 15-21-ը ճանաչողական այցով ժամանել են Հայաստան:

«Արմենպրես»-ի հաղորդմամբ՝ այցի շրջանակում հունիսի 17-ին նրանք հանդիպեցին Հայաստանի Հանրապետության նախագահի տիկին Նունե Սարգսյանի հետ:

Լուսանկարները՝ Գևորգ Պերկուպերկյանի

Հանդիպման սկզբում ներկա էր նաև ՀՀ նախագահ Արմեն Սարգսյանը, ով արգենտինացի կանանց ներկայացրեց Հայաստանի պատմության տարբեր ժամանակներում կնոջ դերակատարումը:

Նունե Սարգսյանի հետ կանայք քննարկեցին կանանց առաջնորդության հարցը ողջ աշխարհում:

«Կարծում եմ, որ սա շատ կարևոր հանդիպում էր՝ կամուրջներ կառուցելու համար, ինչպես նաև Հայաստանի և հատկապես հայ կանանց համար: Այստեղ ներկա էին տարբեր ոլորտներ ներկայացնող կանայք՝ սկսած գյուղատնտեսությունից մինչև տեղեկատվական տեխնոլոգիաներ: Ինձ համար շատ հետաքրքիր էր ագարակատեր կինը, որ գազար է աճեցնում, քանի որ մենք էլ այդ բանջարեղենի լավ հումք ունենք մեր գյուղերից մեկում»,- հանդիպումից հետո լրագրողների հետ զրույցում նշեց Սարգսյանը:

Նրա խոսքով՝ հայ կանանց պետք է ավելի քաջալերել, որպեսզի իրենց գործարար միտքն ավելի զարգացնեն և որևէ բիզնես սկսեն:  

Արգենտինայից Հայաստան է եկել 13 ձեռնարկատեր կին:

Մասնագիտությամբ փաստաբան Ֆաբիանա Ռիկանյոն, ով զբաղվում է տարբեր երկրներում կանանց գործունեության ամրապնդմամբ, լրագրողների հետ զրույցում ասաց, որ Էռնեկյանների ընտանիքն է նախաձեռնել այս այցելությունը:

«Մենք առաջինն այցելել ենք Լոնդոն, հետո Էռնեկյանները կազմակերպեցին մեր այցը Հայաստան: Մեր նախաձեռնության համար ինքնանպատակ չեն տարբեր երկրներ այցելությունները: Դիտարկում ենք, թե որ երկրներում տնտեսության զարգացման ինչ միտումներ կան, ինչից հետո ծրագիր է կազմվում և նոր այցելում ենք տվյալ երկիր»,- շեշտեց Ֆաբիանա Ռիկանյոն:

Մասնագիտությամբ հոգեբան Խուլիանա Դել Ագիլա-Էռնեկյանը, ով «Կարաս» ապրանքանիշով հանդես եկող «Տիեռաս դե Արմենիա» ընկերության գլխավոր տնօրենն է՝ իր հերթին ընդգծեց, որ որպես հայ իր գործունեության միջոցով փորձում է երկու երկրների մշակույթն իրար միացնել:

«Մենք նպատակ ունենք նպաստել և՛ Հայաստանի, և՛ Արգենտինայի կանանց ավելի հզորացմանը, ինչպես նաև աշխատանքային պայմաններ ստեղծել նրանց համար»,- եզրափակեց Խուլիանան:

«Pollera Pantalon» նախաձեռնության անդամները հունիսի 16-ին եղել են Էջմիածնում և հանդիպել են Ն.Ս.Օ.Տ.Տ. Գարեգին Բ-ի հետ: Հունիսի 17-ին, բացի Նունե Սարգսյանի հետ հանդիպումից, լինելու են նաև Գառնիում, տեսնելու են հայկական պատմամշակութային մի քանի կառույցներ: Հունիսի 18-ին հանդիպում են ունենալու ՀՀ Ազգային Ժողովում: