Արտակ Ասատրյանը «Թրանսփարենսի ինթերնեշնլ»-ի ներկայացուցիչների հետ քննարկել է ՀԿ-ների ֆինանսական հաշվետվողականության հարցեր
ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ: ՀՀ արդարադատության նախարարի առաջին տեղակալ Արտակ Ասատրյանը մայիսի 22-ին ընդունել է «Թրանսփարենսի ինթերնեշնլ» հակակոռուպցիոն կենտրոնի (ԹԻՀԿ) ներկայացուցիչներին՝ միջազգային փորձագետ Լյուբեն Պանովի գլխավորությամբ:
Ինչպես «Արմենպրես»-ին տեղեկացրին ՀՀ ԱՆ տեղեկատվության և հասարակայնության հետ կապերի վարչությունից, հանդիպման ընթացքում կողմերը քննարկել են հասարակական կազմակերպությունների ֆինանսական հաշվետվողականությանն առնչվող մի շարք հարցեր:
Փոխնախարար Ասատրյանը ողջունել է հասարակական կազմակերպության ներկայացուցիչներին արդարադատության նախարարությունում՝ կարևորելով ԹԻՀԿ-ի հետ համագործակցության հարուստ փորձը և գործընկերային բարձր հարաբերությունները:
Կողմերն անդրադարձել են հասարակական կազմակերպությունների ֆինանսական հաշվետվողականությանն առնչվող առկա օրենսդրական նախագծի շրջանակում համատեղ արդյունավետ լուծումներ գտնելու հնարավորություններին:
Լյուբեն Պանովը միջազգային փորձի շրջանակում փոխնախարարին ներկայացրել է հասարակական կազմակերպությունների ֆինանսական հաշվետվողականության որոշ մոդելներն ու դրանց կիրառման առանձնահատկությունները:
Ամփոփելով հանդիպումը՝ Արտակ Ասատրյանը շնորհակալություն է հայտնել արդյունավետ քննարկման համար և առկա խնդիրներին համատեղ լուծումներ գտնելու ուղղությամբ համագործակցությունը խորացնելու պատրաստակամություն է հայտնել:
Բաժանորդագրվեք մեր ալիքին Telegram-ում