ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ:  Ռեժիսոր, սցենարիստ, երգահան Քրիստ Մանարյանի «Իմ սիրտը քոնն է, Միքայել» ֆիլմը պատմում է Երևանի էստրադային և ջազային արվեստի պետական քոլեջի ուսանողների հետաքրքիր և բուռն կյանքի մասին: Սեր, անձնվիրություն, ներողամտություն. ֆիլմի միջոցով ռեժիսորը հորդորում է սիրել անկախ հանգամանքներից: Կինոնկարի գլխավոր դերակատարներն են Մելինե Ապիկյանը, Կարեն Կոլոսովը, Տիգրան Դավթյանը, Արթուր Մելիքյանը:

«Արմենպրես»-ի հաղորդմամբ` կինոնկարի պրեմիերան տեղի ունեցավ մայիսի 21-ին «Մոսկվա» կինոթատրոնում:

«Այս ֆիլմով ցանկանում ենք ասել, որ պետք է սիրել անձնվիրաբար, առանց հաշվարկների, սրտի թելադրանքով: Մարդն ավելի երջանիկ է, երբ սիրում է, քան երբ սիրված է: Սիրիր և նվիրվիր, թե դրանից հետո ի՞նչ կլինի, թող Աստվածները որոշեն»,- նշեց Մանարյանն ու շնորհակալություն հայտնեց այն բոլոր մարդկանց, որոնք եղել են իր կողքին ու աջակցել են ֆիլմի ստեղծմանը:

Ֆիլմում հիմնականում ընդգրկված են Մանարյանի ուսանողները, որոնք սովորում են Երևանի էստրադային և ջազային արվեստի պետական քոլեջում:

Նրանցից Մելինե Ապիկյանը խոստովանեց, որ Նոյեմին, ում մարմնավորում է, բազմաթիվ նմանություններ ունի իր հետ: «Նոյեմին նախաձեռնող է: Այդպիսին եմ և ես. լիդեր, մարդկանց համախմբող, բայց և հավասարակշռված ու համեստ: Նոյեմին ավելի վճռական է սերը, զգացմունքներն արտահայտելու հարցում, այնինչ ես ավելի զուսպ եմ»,-ասաց դերասանուհին ու հավելեց, որ կուզեր իրական կյանքում Նոյեմիները շատ լինեն, քանի որ նա սովորեցնում է սիրել առանց բայցերի, սիրել առանց ակնկալիքների, լինել լավ ընկեր, լավ դուստր:

Խոսելով Մանարյանի հետ համագործակցության մասին՝ նա ընդգծեց, որ շատ հետաքրքիր, միևնույն ժամանակ պարտավորեցնող էր Մանարյանի հետ աշխատելը: «Մի փոքր բարդ էր, քանի որ ես էլ եմ ապագա ռեժիսոր և իմ ռեժիսորական ամբիցիաներն ինձ մի փոքր խանգարում էին, սակայն Մանարյանը կարողանում էր ամեն ինչ իր ձեռքը վերցնել: Այնպես որ մեր ֆիլմն անկեղծ է, երևանյան է՝  հարուստ հրաշալի երաժշտությամբ, որի հեղինակը Քրիստ Մանարյանն է»,-եզրափակեց Ապիկյանը:

«Իմ սիրտը քոնն է, Միքայել» կինոնկարում քոլեջի երիտասարդ ուսանողուհին փորձում է փրկել իր սիրած տղայի կյանքը, որը շտապ վիրահատության կարիք ունի:

Ֆիլմը երևանյան է, նրանում կա սեր, դավաճանություն, ընկերասիրություն ու  լավ երաժշտություն, նախատեսված է երիտասարդ, միջին ու ավագ սերնդի դիտման համար: