Գեղարքունիքի մարզպետը խորհրդակցություն անցկացրեց հանրակրթական դպրոցների տնօրենների հետ
ԳԱՎԱՌ, 21 ՄԱՅԻՍԻ, ԱՐՄԵՆՊՐԵՍ:Գեղարքունիքի մարզպետարանի նիստերի դահլիճում Գեղարքունիքի մարզպետ Գնել Սանոսյանը խորհրդակցություն անցկացրեց Գեղարքունիքի մարզի հանրակրթական դպրոցների տնօրենների հետ: «Արմենպրես»-ի տեղեկացմամբ ՝ մարզպետը նախ անդրադարձավ մայիսի 24-ին կայանալիք «Վերջին զանգ» եւ «Վերջին դաս» միջոցառումների կազմակերպմանը եւ անցկացմանը, հորդորելով՝ միջոցառումների ընթացքում խիստ վերահսկողություն սահմանել ավարտական դասարանների աշակերտների վարքագծի նկատմամբ:
«Վերջին զանգի միջոցառումների ընթացքում խնդրում եմ ուշադրություն դարձնել, որպեսզի շրջանավարտների մոտ անցանկալի միջադեպեր չգրանցվեն, եւ ամեն ինչ ընթանա խաղաղ մթնոլորտում ու բարձր տրամադրությամբ : Ծնողներին եւս ներգրավեք այդ աշխատանքներում: Միջոցառումների ընթացքը կվերահսկեն նաև ոստիկանության եւ մարզպետարանի աշխատակիցները: Առաջարկում եմ՝ խիստ ուշադրություն դարձնել նաեւ ավարտական քննությունների կազմակերպչական աշխատանքներին, քանզի նման օրերին մենք տարբեր համայնքներում ապահովելու ենք մոտ 1600 շրջանավարտի տեղաշարժը»,- նշեց Գնել Սանոսյանը:
Դիմելով հանրակրթական դպրոցների տնօրեններին՝ «dasaran.am » կրթական ծրագրի հիմնադիր Սուրեն Ալոյանն անդրադարձավ հանրակրթական դպրոցների աշակերտների եւ ուսուցիչների համար ստեղծված աբոնեմենտային օնլայն ծառայությունից օգտվելու ծրագրին, տեղեկացնելով, որ պետությունը ուսուցչին եւ աշակերտին հնարավորություն է ընձեռել՝ էլեկտրոնային տարբերակով պլանավորել իրենց մշակութային կյանքը եւ մինչեւ հուլիսի 30-ը այցելել 2-3 մշակութային հաստատություն: Ըստ բանախոսի՝ «dasaran.am» կրթական ծրագիրը հանրակրթական դպրոցների ուսուցիչների, ծնողների եւ աշակերտների շրջանում կազմակերպում է եվրոպական չափանիշներին համապատասխան վերապատրաստումներ, որոնց, ցանկության դեպքում, կարող են մասնակցել նաեւ Գեղարքունիքի մարզի ներկայացուցիչները:
Հանրակրթական դպրոցներում սանիտարական նորմերի խախտման եւ դրանց վերաբերյալ կազմված վարչական վարույթներին անդրադարձավ ՀՀ առողջապահական եւ աշխատանքի տեսչական մարմնի արեւմտյան տարածաշրջանի պետի պաշտոնակատար Անուշ Պողոսյանը: Դպրոցներում սանիտարական նորմերի խախտումները բացառելու նպատակով հանձնարարվեց տնօրեններին՝ սերտորեն համագործակցել համայնքապետարանների եւ համայնքում գործող առողջապահական առաջնային պահպանման օղակների հետ:
Հանդիպման ընթացքում մարզպետ Գնել Սանոսյանը անդրադարձավ աշխատանքային կարգապահությանը, խոսեց դպրոցների տնօրենների պաշտոնների համար կազմակերպվող վերապատրաստումների եւ դրանց արդյունքում հավաստագրերի ձեռքբերման մասին, հորդորելով՝ չխոչընդոտել դպրոցներում դասավանդող մանկավարժների՝ վերապատրաստումներին մասնակցելու դիմումներին: Մարզպետը խոսեց նաև դպրոցներում մանկավարժական կադրերի նշանակման, դպրոցական բուֆետների եւ դպրոցական խմբակների գործունեության իրավական գործընթացների ապահովման, ուսումնական տարին բարձր ցուցանիշներով փակելու եւ այլ հարցերի շուրջ:
Հանդիպման ավարտին Գնել Սանոսյանը շնորհակալություն հայտնեց մարզից հանրապետական օլիմպիադաներում մրցանակային տեղեր զբաղեցրած աշակերտներին, նրանց տնօրեններին և ուսուցիչներին:
Խոսրով Խլղաթյան
Բաժանորդագրվեք մեր ալիքին Telegram-ում