Ժամանակը Երևանում՝ 11:07:36,   7 Օգոստոս

Նպատակ կա Երևանի տրանսպորտի շարժակազմի շուրջ 10 տոկոսը դարձնել էլեկտրական. մանրամասներ էլեկտրամոբիլների ծրագրից

 Նպատակ կա Երևանի տրանսպորտի շարժակազմի շուրջ 10 տոկոսը դարձնել 
էլեկտրական. մանրամասներ էլեկտրամոբիլների ծրագրից

ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ: Հայաստանում 2020 թվականին էլեկտրամոբիլների շահագործման ենթակառուցվածքների առումով էական տեղաշարժ կլինի: Արդյունքում՝ կավելանա լիցքավորման կայանների թիվը: Թե որքանով կավելանա, ՀՀ բնապահպանության նախարարության բնապահպանական ռազմավարական ծրագրերի մոնիտորինգի վարչության պետ Լուսինե Ավետիսյանն «Արմենպրես»-ի հետ զրույցում նշեց , որ այս պահին դժվար է ասել, հաշվի առնելով, որ այն ուղղակիորեն կապված է էլեկտրամոբիլների թվաքանակի հետ:  

«Ներկայում քննարկման փուլում է «Գլոբալ էկոլոգիական հիմնադրամ-7»-ի շրջանակներում  «Հայաստանում Էլեկտրական շարժունակության» ծրագիրը: Այն նախատեսում է ինչպես էլեկտրամոբիլների լիցքավորման կայանների ստեղծման, այնպես էլ էլեկտրամոբիլների ձեռքբերման հնարավորություն»,-ասաց Լուսինե Ավետիսյանը:

Հանրապետությունում ներկայում գործում է էլեկտրամոբիլի 9 լիցքավորման կայան, որից 4-ը Երևանում է, սակայն այդ կայանների մեծ մասում կարող են լիցքավորվել «Տեսլա» ընկերության ավտոմեքենաները: Նոր նախագծով նախատեսվում է հիմնել ունիվերսալ կայաններ, և մյուս էլեկտրամոբիլները ևս կկարողանան լիցքավորվել: Լուսինե Ավետիսյանը նշեց, որ արդեն տարբեր ընկերությունների կողմից կայանների տեղադրման առաջարկներ են ստացել:

Էլեկտրամոբիլների շահագործման ենթակառուցվածքների զարգացման նախաձեռնությունը պատահական չէ: Կառավարությունը խնդիր է դրել խթանել Հայաստանում էլեկտրամոբիլների շահագործումը: Դրան ուղղված քայլերից է արտոնությունների տրամադրումը: Եթե ներկայում գործում է մթնոլորտային օդ արտանետումների համար բնապահպանական հարկից ազատումը, ապա Ազգային ժողովում առաջին ընթերցմամբ հավանության է արժանացել օրենքի նախագիծը, որով ԱԱՀ-ից կազատվի էլեկտրամոբիլի ներմուծումն ու օտարումը: Խոսքը միայն էլեկտրական շարժիչով աշխատող տրանսպորտային միջոցների մասին է: Լուսինե Ավետիսյանը նշեց, որ դա շահագրգռող հանգամանք կարող է լինել: Ինչ վերաբերում է բյուջեի մուտքերի նվազմանը, ապա Լուսինե Ավետիսյանը նշեց՝  քանի որ տարեկան քիչ թվով էլեկտրամոբիլներ են ներկրվում, ապա խոսքը փոքր գումարի մասին  է:

Ոստիկանության տվյալների համաձայն՝ Հայաստանում հաշվառված է 5 էլեկտրամոբիլ, որից 7-ը ներկրվել է 2017-ին, 7-ը՝ 2018-ին, և մեկ մեքենա 2019 թվականի առաջին եռամսյակում:

Լուսինե Ավետիսյանը նշեց, որ Գլոբալ էկոլոգիական հիմնադրամի (ԳԷՀ) հետ իրականացվող ծրագրով ձեռք կբերվեն էլեկտրամոբիլներ, որոնք տեղ կգտնեն կառավարության շարժակազմում:

««Հայաստանում Էլեկտրական շարժունակության» ծրագրի շրջանակներում հիմնադրամի կողմից 700 հազար դոլարի չափով, ըստ նախնական պայմանավորվածության, հատկացումները նախատեսվում է ուղղել 12 էլեկտրամոբիլի և 3 լիցքավորման կայանի ձեռքբերմանը։ Ըստ պայմանների՝  համաֆինանսավորումը կիրականացվի 1:7 հարաբերակցությամբ, ԳԷՀ-ից եկող յուրաքանչյուր դոլարի դիմաց պետք է ապահովվի  երկրի կողմից ևս 7 դոլարին համարժեք համաֆինանսավորում, սակայն պարտադիր չէ, որ լինեն պետական միջոցներ, դրանք կարող է լինել մասնավոր հատվածի ներդրումներ, այլ ներդրումներ /այդ թվում՝ բնեղեն/,  արդեն իսկ ընթացող էլեկտրական շարժունակության և վերալիցքավորման վերաբերյալ ծրագրեր, վերականգնվող էներգիայի ծրագրեր և այլն»,-ասաց նա։ Նախարարության ներկայացուցիչն ընդգծեց, որ Էլեկտրական շարժիչով մեքենաների թվի ավելացմամբ բնապահպանական լուրջ խնդիր է լուծվում՝ կապված օդի աղտոտվածության հետ:

Երևանի քաղաքապետարանը գնում է այն ճանապարհով, որ քաղաքը բնապահպանական տեսանկյունից բարենպաստ վիճակում հայտնվի: Քաղաքապետի մամուլի քարտուղար Հակոբ Կարապետյանն «Արմենպրես»-ի հետ զրույցում հիշեցրեց քաղաքապետի խոսքն այն մասին, որ Երևանը պետք է ավտոմեքենաների քաղաքից վերածվի հետիոտնի քաղաքի:

«Ահա այս համատեքստում է էլեկտրական տրանսպորտի զարգացումը: Ինչպես գիտեք, աշխատանքներ են տարվում Երևանի տրասնպորտային նոր ցանցի ուղղությամբ: Նախատեսվում է հրաժարվել դիզելային շարժիչներից: Կլինեն գազային շարժիչներ, բայց նաև շարժակազմի շուրջ 10 տոկոսը կլինի էլեկտրական տրանսպորտ: Դա կլինի ներկա տրոլեյբուսային ցանցի վերազինման և համալրման կամ էլեկտրական ավտոբուսների տեսքով»,-ասաց Հակոբ Կարապետյանը: Հաշվի առնելով, որ էլեկտրական տրանսպորտի ներգրավումն արժեքով բարձր է, արդյո՞ք դա կարող է ազդել ուղեվարձի վրա: Հակոբ Կարապետյանը նշեց, որ նախ դիտարկում են դրամաշնորհներ ներգրավելու հարցը, երկրորդ՝ ուղեվարձի գնային համակարգը լինելու է շատ ճկուն:   

Աննա Գզիրյան





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ