Մայիսի 20-ին սպասվող իրադարձությունները
ԵՐԵՎԱՆ, 20 ՄԱՅԻՍԻ, ԱՐՄԵՆՊՐԵՍ: «Արմենպրես» պետական լրատվական գործակալությունը ներկայացնում է այսօր սպասվող իրադարձությունները:
Պետական օժանդակությամբ ի՞նչ ծրագրեր են իրականացվում բուսաբուծության ոլորտում, որո՞նք են արդյունավետ, ի՞նչ խնդիրներ են վերհանվել: Այս և այլ հարցերի պատասխանները կլինեն ՀՀ գյուղատնտեսության նախարարությունում այսօր՝ մայիսի 20-ին, հրավիրված մամուլի ասուլիսում: Նախարարի տեղակալ Գառնիկ Պետրոսյան կներկայացնի մանրամասներ: Նա կանդրադառնա նաև Արարատի և Արմավիրի մարզերում լոլիկի հարավամերիկյան ցեց վնասատուի դեմ պայքարի միջոցառումների իրականացման պիլոտային ծրագրին:
ԵԱՏՄ հնգամյակը եւ ԵԱՏՄ-ում Հայաստանի նախագահության տարին. Որո՞նք են եվրասիական տնտեսական ինտեգրման իրողությունները, հաջողությունները եւ հեռանկարները: ԵՊՀ միջազգային հարաբերությունների ֆակուլտետում կանցկացվի դասախոսություն, որի ընթացքում փորձագետները կանդրադառնան թեմային:
Բարձրագույն կրթության հիմնախնդիրները, առկա մարտահրավերներն ու դրանց հնարավոր լուծումները կրթության ոլորտի փորձագետների, պատասխանատուների ուշադրության կենտրոնում են: Այսօր հրավիրված քննարկմանը ՀՀ ԿԳ նախարարի խորհրդական Սամվել Կարաբեկյանը, Բարձրագույն որակավորման կոմիտեի նախագահ Սմբատ Գոգյանը, ոլորտի փորձագետները կներկայացնեն իրենց դիտարկումները:
Լրագրողների հետ կհանդիպի «Էրեբունի» պատմահնագիտական արգելոց-թանգարանի նորանշանակ տնօրեն Միքայել Բադալյանը, ով կներկայացնի թանգարանի նոր ծրագրերն ու խնդիրները:
Երևանում անցկացված Ազգային գեղեցկության մրցույթի հաղթող Հայկուհի Մաթևոսյանն ու մրցույթի կազմակերպիչները հանդես կգան մամուլի ասուլիսում: Նրանք կանդրադառնան մրցույթի մանրամասներին և կխոսեն հետագա նախագծերից:
Այս և այլ թեմաների մասին կարող եք մանրամասն ընթերցել armenpress.am կայքէջում: Հետևեք մեզ նաև թվիթերում և ֆեյսբուքում:
Բաժանորդագրվեք մեր ալիքին Telegram-ում