«Սասունցիների պարը» բալետային ներկայացումը բուռն ծափողջյուններով է ընդունվել Ստամբուլում
ԵՐԵՎԱՆ, 10 ՄԱՅԻՍԻ, ԱՐՄԵՆՊՐԵՍ: Բեմադրիչ Գրիգոր Խաչատրյանի «Սասունցիների պարը» բալետային ներկայացմամբ Նոր Նորքի հայորդաց տան սաները հաջողությամբ են հանդես եկել Ստամբուլի օպերային թատրոնում` արժանանալով ոչ միայն հայ, այլև օտարազգի արվեստասերների ծափողջյուններին:
«Արմենպրես»-ի հաղորդմամբ` մայիսի 7-ին ներկայացմանը ներկա են եղել Թուրքիայի խորհրդարանի հայազգի պատգամավոր Կարո Փայլանը և այլ հյուրեր: «Հանդիսատեսի վաթսուն տոկոսը հայեր էին, մնացյալը` այլազգիներ: Ստամբուլի քաղաքապետը, ներկայացումը դիտելուց հետո ասաց, որ Հայաստանից այս ներկայացման միջոցով հայերն իրենց հետ սեր են բերել»,-մեզ հետ զրույցում պատմեց Գրիգոր Խաչատրյանը:
Նրա համոզմամբ`դահլիճում ներկա մարդիկ, որոնք չէին տիրապետում հայերենին, հասկացել են այն:
Գևորգ Էմինի «Սասունցիների պարը» պոեմի հիման վրա բեմադրված բալետային ներկայացման երաժշտությունը գրել է կանադաբնակ կոմպոզիտոր Մաժակ Թոշիկյանը:
«Լավ է, որ Թոշիկյանը հայ գրողի ստեղծագործությունն է վերածել երաժշտության, որը շատ ճկուն է և բեմադրիչի համար լայն հեռանկարներ է բացում»,-ասաց Խաչատրյանը:
«Սասունցիների պարը» ներկայացման առաջնախաղը տեղի է ունեցել նախորդ տարվա սեպտեմբերին Մայր թատրոնում, հոկտեմբերին` Գյումրիում:
Գրիգոր Խաչատրյանի խոսքով` նախատեսում ենք ներկայացումը հանձնել նաև Ստեփանակերտի արվեստասերների դատին. հնարավոր է` բեմադրությամբ հանդես գան նաև Տորոնտոյում և Մոնրեալում:
Ներկայացման խորեգրաֆներն են Արա Ասատուրյանը և Արման Ջուլհակյանը: Բեմադրության մեջ որպես պատմիչ հանդես է գալիս երգչուհի Գոհար Հովհաննիսյանը:
Բաժանորդագրվեք մեր ալիքին Telegram-ում