ԵՐԵՎԱՆ, 25 ԱՊՐԻԼԻ, ԱՐՄԵՆՊՐԵՍ: ՀՀ ազգային ժողովի տնտեսական հարցերի մշտական հանձնաժողովը հավանության արժանացրեց ապրիլի 30-ին ՀՀ հարկային օրենսգրքում փոփոխություններ և լրացումներ կատարելու մասին օրենքի նախագծի և հարակից օրենքների նախագծերի փաթեթի վերաբերյալ խորհրդարանական լսումներ անցկացնելու որոշումը: «Արմենպրես»-ի հաղորդմամբ՝ որոշումն ընդունվեց ապրիլի 25-ին հանձնաժողովի արտահերթ նիստում:

«Հարկային օրենսգրքի փոփոխությունների հետ կապված պատգամավորները կարող են առաջարկություններ ներկայացնել մինչ ապրիլի 29-ը: Ամենահարմար օրը 30-ն է լիագումար նիստերի դահլիճում լսումներ անցկացնելու համար: Ձևաչափն ու օրակարգը կքննարկենք ավելի ուշ»,-ներկայացրեց հանձնաժողովի նախագահ Բաբկեն Թունյանը:

Թունյանը նշեց, որ այդ ընթացքում և դրանից հետո մինչ տնտեսական հանձնաժողովի նիստը կարող են նաև առանձին հանդիպումներ լինել: Նպատակն այն է, որ մինչ հանձնաժողովի նիստը առավելագույնս թափանցիկություն ապահովեն ու մարդկանց կարծիքները լսեն: Նա վստահեցրեց, որ  լսումների համար իրազեկումը պատշաճ կերպով կապահովեն: