Կահիրեում տեղի է ունեցել Եգիպտա-եվրոպական խորհրդի հերթական հանդիպումը
ԵՐԵՎԱՆ, 22 ԱՊՐԻԼԻ, ԱՐՄԵՆՊՐԵՍ: Կահիրեում ապրիլի 19-ին տեղի է ունեցել Եգիպտա-եվրոպական խորհրդի հերթական հանդիպումը, որի շրջանակներում քննարկվել են Եգիպտոսի և եվրոպական երկրների միջև համագործակցության հեռանկարները։
Ինչպես «Արմենպրես»-ին հայտնեցին ՀՀ ԱԳՆ լրատվության և հանրային դիվանագիտության վարչությունից, միջոցառմանը մասնակցել են Եգիպտոսում Հայաստանի, Մեծ Բրիտանիայի և Ավստրալիայի դեսպանները, մեծ թվով խոշոր գործարարներ, հեղինակավոր տնտեսագետներ, ինչպես նաև ներկա և նախկին պետական բարձրաստիճան պաշտոնյաներ և դեսպաններ։
ՀՀ դեսպան Կարեն Գրիգորյանն իր ելույթում ներկայացրել է Հայաստանի տնտեսական և ներդրումային հնարավորությունները, Եգիպտոսի հետ տնտեսական համագործակցության համար առավել հեռանկարային ուղղությունները։ Կարեն Գրիգորյանն ընդգծել է նաև Եգիպտոսի և ԵԱՏՄ միջև ազատ առևտրի պայմանագրի ստորագրման դրական ազդեցությունը երկկողմ առևտրատնտեսական կապերի վրա։ Միաժամանակ ՀՀ դեսպանն անդրադարձել է Հայաստանից դեպի Եգիպտոս տարեցտարի աճող զբոսաշրջության ծավալներին, ինչպես նաև ուսանողների փոխանակման ծրագրերին՝ կարևորելով դրանք երկու բարեկամ երկրների միմյանց նկատմամբ ճանաչողության բարձրացման տեսանկյունից։
Բաժանորդագրվեք մեր ալիքին Telegram-ում