ՍՏՐԱՍԲՈՒՐԳ, 11 ԱՊՐԻԼԻ, ԱՐՄԵՆՊՐԵՍ։ Ավարտվեց ՀՀ վարչապետ Նիկոլ Փաշինյանի և Եվրոպայի խորհրդի գլխավոր քարտուղար Թորբյորն Յագլանդի հանդիպումը։ «Արմենպրես»-ի հաղորդմամբ՝ վարչապետ Փաշինյանն ու Թորբյորն Յագլանդը հանդես եկան մամուլի ասուլիսով։ ԵԽ գլխավոր քարտուղարը, ողջունելով Նիկոլ Փաշինյանի ներկայությունը Եվրոպայի խորհրդում, նշեց, որ ՀՀ վարչապետի հետ ունեցել են շատ արդյունավետ հանդիպում։ 

Հանդիպմանը անդրադարձ է կատարվել Հայաստանում տեղի ունեցած հեղափոխությանը, ժողովրդավարական գործընթացներին։ 

Նա ընդգծեց, որ ակնհայտ է մի բան՝ Հայաստանը բացարձակ եվրոպական երկիր է, եվրոպական արժեքներով։ 

Նիկոլ Փաշինյանը, շնորհակալություն հայտնելով ջերմ ընդունելության համար, նշեց, որ ընդգրկուն օրակարգով հանդիպում են անցկացրել։ 

«Հայաստանն իրականացրած հեղափոխությամբ ընդգծեց եվրոպական երկիր լինելու հանգամանքը։ Մեր երկրում իրականացրած հեղափոխությունն ամբողջովին տեղական գործընթաց էր, ոչ մի արտաքին ազդեցություն չկար։ Այդ հեղափոխությունը մեր ժողովրդի ցանկությունն էր»,- ասաց Նիկոլ Փաշինյանը։

Նա նշեց, որ կասկած չկա մի հարցում Հայաստանի իշխանությունների օրակարգում ժողովրդավարական բարեփոխումներն են։ Վարչապետ Փաշինյանն ընդգծեց Եվրոպայի խորհրդի գործունեությունը Հայաստանում, որն իր նպաստն է բերել երկրում ժողովրդավարության զարգացմանը։ Նրա խոսքով՝ ժողովրդավարության զարգացման ճանապարհին Հայաստանը Եվրոպայի խորհրդի մեծ փորձի կարիքն ունի մի շարք ուղղություններով։ 

«Հանդիպմանը մենք նշել ենք, որ ակտիվորեն շարունակելու ենք համագործակցությունը՝ Հայաստանում ժողովրդավարությունը դարձնելով ավելի ուժեղ»,-ասաց նա։