Ժամանակը Երևանում՝ 11:07:36,   22 Ապրիլ

Արտաքին առևտրի ցուցանիշների փոփոխություններն ու վերանայումները պայմանավորված են ԵԱՏՄ Հայաստանի անդամագրմամբ


ԵՐԵՎԱՆ, 26 ՄԱՐՏԻ, ԱՐՄԵՆՊՐԵՍ: Արտաքին առևտրի ցուցանիշների փոփոխություններն ու վերանայումները պայմանավորված են Եվրասիական տնտեսական միությանը Հայաստանի անդամագրմամբ: «Արմենպրես»-ի հետ զրույցում այս մասին ասաց ՀՀ վիճակագրական կոմիտեի վճարային հաշվեկշռի և արտաքին առևտրի բաժնի պետ Քրիստինե Պողոսյանը:

Նրա խոսքով՝ առաջին հերթին, ԵԱՏՄ երկրների միջև փոխադարձ առևտրի ցուցանիշները փոխադարձ առևտրի մասնակիցները հաշվետվական ձևերով պետք է ներկայացնեին մաքսային մարմիններին, քանզի նրանք այլևս բեռնամաքսային հայտարարագիր ներկայացնող չեն հանդիսանում: «Անգամ ԵԱՏՄ անդամակցության առաջին տարվա՝ 2015թ-ի առաջին 5 ամիսներին ՀՀ արտաքին առևտրի վերաբերյալ ցուցանիշները հրապարակելիս տողատակով միշտ հայտարարվում էր, որ այդ ցուցանիշներն ամբողջական չեն՝ պայմանավորված ԵԱՏՄ երկրների միջև փոխադարձ առևտրի ցուցանիշների ոչ ամբողջական հավաքմամբ, քանզի ոչ բոլոր ռեսպոնդենտների կողմից էր մաքսային մարմիններին ներկայացվում տեղեկատվություն (հաշվետվություն) փոխադարձ առևտրի վերաբերյալ»,-ասաց նա:

Պողոսյանը նշեց, որ միայն 2015թ-ի հունիսից մաքսային մարմիններին հաջողվել է քիչ թե շատ ամբողջացնել փոխադարձ առևտրի մասնակիցների վերաբերյալ տեղեկատվությունը, սակայն, հետագա ժամանակահատվածից առ այսօր ԵԱՏՄ փոխադարձ առևտրի մասով ռեսպոնդենտների կողմից նախորդող ժամանակաշրջանների համար տրամադրված ցուցանիշների ճշգրտումները հաճախակի են, գրեթե բոլոր ամիսներին, նույնիսկ էական չափաբաժիններով: «Կարծում ենք, դեռ կպահանջվի որոշակի ժամանակահատված մինչ ԵԱՏՄ անդամ երկրների փոխադարձ առևտրի մասնակիցները կհարմարվեն այդ միության մաքսային մարմիններին հաշվետու լինելու պահանջներին և կապահովեն դրանց ամբողջական կատարումը»,-ընդգծեց նա:

ՀՀ վիճակագրական կոմիտեի վճարային հաշվեկշռի և արտաքին առևտրի բաժնի պետը հավելեց, որ  միջազգային վիճակագրական պրակտիկայում ընդունված է, որ եթե ռեսպոնդենտը ճշգրտում կամ վերանայում է իր կողմից նախկինում վիճակագրություն արտադրող մարմիններին ներկայացված ցուցանիշները, ապա վիճակագրություն արտադրող մարմինը պարտավոր է դրա հիման վրա կատարելու վերահաշվարկներ՝ վերանայելով նախկինում հրապարակված ցուցանիշները: «Դրանով է պայմանավորված վիճակագրական ցուցանիշների տարբեր որակումները՝ նախնական շտապ հավաքված, նախնական վերանայված և վերջնական ամփոփ»,-ընդգծեց նա:




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ