Նիկոլ Փաշինյանն անդրադարձավ վարկերի տոկոսադրույքների խնդրին և ստացավ պարզաբանումներ
ԵՐԵՎԱՆ, 21 ՄԱՐՏԻ, ԱՐՄԵՆՊՐԵՍ: Կառավարության այսօրվա նիստում վարչապետ Նիկոլ Փաշինյանը Կենտրոնական բանկի նախագահ Արթուր Ջավադյանի հետ քննարկման ժամանակ հայտարարեց, որ քաղաքացիների կողմից բողոքները կրկնվում են, երբ առաջարկվում է վարկ, օրինակ, 15 տոկոսով, տեղում պահանջում են որոշակի ծառայությունների վճարներ և, իրականում, ստացվում է տոկոսը 24 է:
«Ասում ենք, որ վարկի տոկոսը նվազեց, սակայն քաղաքացիների հետ շփումից ստացվում է, որ ծառայությունների վճարների միջոցով իրական տոկոսները չենք կարողանում արձանագրենք: Վարկը ստանալու պահին քաղաքացին ի՞նչ ծախսեր պետք է անի և այս գործընթացը որքանո՞վ է օրինական և տրամաբանական», - «Արմենպրես»-ի հաղորդմամբ, ասաց վարչապետը:
Կենտրոնական բանկի նախագահը նշեց, որ խոսքն էֆեկտիվ տոկոսադրույքի մասին է և ընդունված սպառողական կրեդիտավորման մասին օրենքով քաղաքացիների շահերը պաշտպանված են:
«Մինչև տասը միլիոնանոց սպառողական վարկերի դեպքում ֆինանսական կառույցը պարտավոր է բոլոր տիպի վճարները ներառի տոկոսի մեջ և ընդգծված ձևով ներկայացվի իր տոկոսը որքան է, կառավարման վճարը, գնահատման վճարը մտցնի քաղաքացու տոկոսի մեջ, գումարը ֆիքսի, թե որքան է մարելու, որից հետո միայն քաղաքացին վարկը ստորագրում է», - ասաց նա:
Վարչապետը հետաքրքրվեց՝ հնարավոր չէ՞ տոկոսի մասին հայտարարությունները այդ հաշվառմամբ անել, որպեսզի իմանան՝ շուկայում ինչ է կատարվում:
«Մտավախությունն այն է, որ թվերն իրականությունը չեն արտացոլում և կարող ենք սխալ եզրակացությունների գալ», - նշեց վարչապետը:
Փոխվարչապետ Մհեր Գրիգորյանը վստահեցրեց, որ հայտարարված տոկոսադրույքները բացարձակապես համապատասխանում է իրականությանը։
«Ձեր ասած խնդիրը գուցե մանր սպառողական վարկերին է վերաբերում, բայց, կարծում եմ, որ շուկան կկարգավորի, ԿԲ-ն էլ բավարար գործիքակազմ ունի, որ զսպի», - ասաց փոխվարչապետը։
«Իմ խնդիրն է հասկանալ ճշմարտությունը, որ հինգ հարյուր հազար վարկի դիմաց պահանջում են հիսուն հազար դրամ, ստացվում է վատ դրության մեջ ենք դնում գյուղացուն», - նշեց Փաշինյանը։
Բնապահպանության նախարար Էրիկ Գրիգորյանն օրինակ բերեց 2,5 միլիոն դրամ վարկ վերցնելու և պահանջվող վճարների մասին:
Արթուր Ջավադյանը նշեց, որ պետության վերցրած վարկերն էլ են այդպիսին, դրանց համար էլ վճարներ կան: Նա բարձրացրեց գրավատների հարցը և նշեց, որ այստեղ խնդիր կա նրանց կողմից ներկայացված տոկոսադրույքների առումով, քանի որ դա երբեմն գերազանցում է հարյուր տոկոսը:
«Հայաստանում հարյուր տոկոսով վարկ կա՞», - հարցրեց վարչապետը։ Ի պատասխան Արթուր Ջավադյանն ասաց, որ, կարծում է, դրանից ավելի էլ կա:
ԿԲ նախագահը չհամաձայնեց, որ լոմբարդները փոքր և միջին բիզնես են, և օրինակ բերեց, թե որքան հարկ են տալիս լոմբարդները:
«Ֆինանսական հարաբերություններում և, ընդհանրապես, բոլոր հարաբերություններում ամենակարևոր արձանագրումը հետևյալն է, որ ամեն մարդ, ի վերջո, ինքն է պատասխանատու իր գործունեության հետևանքների համար: Սա ՀՀ-ում շատ դեպքերում արձանագրված չէ», - ասաց Նիկոլ Փաշինյանը։
Վարչապետն օրինակ բերեց, որ նամակ է ստանում, թե մարդը մեկին սպանել է, սակայն հիմա շատ վատ վիճակում է սոցիալական առումով, երեխաներ ունի և այլն։ Նա հարց բարձրացրեց, թե իր արարքից առաջ ինչո՞ւ չի մտածել իր երեխաների մասին և փորձ է անում իր արած արարքի պատասխանատվությունը դնել այլ մարմնի վրա:
«Մեզնից յուրաքանչյուրն անձամբ ինքն է պատասխանատու իր որևէ գործողության և դրա հետևանքների համար։ Դա չի նշանակում, որ կառավարությունը քաղաքացիներին մենակ է թողնում, այլ ցանկանում է այս մասին խոսակցություն ունենալ, որ մեկս մյուսին վատ վիճակի մեջ չգցենք», - ասաց ՀՀ վարչապետը։
Բաժանորդագրվեք մեր ալիքին Telegram-ում