ՄԱԿ-ի բնակչության հիմնադրամի գործադիր տնօրենը բարձր է գնահատել ՀՀ կառավարության հետ փոխգործակցությունը
ԵՐԵՎԱՆ, 14 ՄԱՐՏԻ, ԱՐՄԵՆՊՐԵՍ: ՀՀ աշխատանքի և սոցիալական հարցերի նախարար Զարուհի Բաթոյանը հանդիպել է ՄԱԿ-ի բնակչության հիմնադրամի գործադիր տնօրեն Նատալյա Քանեմի հետ։
«Արմենպրես»-ի հաղորդմամբ՝ նախարարը հանդիպման մանրամասների մասին գրառում է կատարել «Ֆեյսբուքի» իր պաշտոնական էջում:
Զարուհի Բաթոյանը նշել է, որ դոկտոր Քանեմը բարձր է գնահատել 3 հիմնական ուղղություններով (ընտանիքի պլանավորում, գենդերային հիմքով բռնության դեմ պայքար և վերարտադրողական առողջություն) ՀՀ կառավարության հետ փոխգործակցությունը:
«Իմ շնորհակալությունը հայտնեցի հիմնադրամին՝ Հայաստանում գենդերային հավասարության, ընտանեկան բռնության դեմ պայքարի և մարդու իրավունքների պաշտպանության հարցերում աջակցելու համար՝ այդ համատեքստում հիշատակելով նաև ընտանեկան բռնության կանխարգելման մասին օրենքի ընդունումն ու այն բարելավելու նպատակով առաջիկա գործընթացները»,- նշված է Բաթոյանի գրառման մեջ։
Հանդիպման վերջում Նատալյա Քանեմը Զարուհի Բաթոյանին հրավիրել է Նայրոբիում կայանալիք համաժողովին, որտեղ ՄԱԿ-ի բնակչության հիմնադրամը կտոնի իր ստեղծման 50-ամյակը և 1994 թվականին Կահիրեում տեղի ունեցած Բնակչության և զարգացման համաժողովի 25-ամյակը։
Բաժանորդագրվեք մեր ալիքին Telegram-ում