Պատգամավորն առաջարկում է մեքենաների ներմուծման մաքսատուրքերի բարձրացումը հետաձգելու նպատակով ԵԱՏՄ-ում բանակցություններ վերսկսել
ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: ՀՀ ազգային ժողովի «Բարգավաճ Հայաստան» խմբակցության պատգամավոր Միքայել Մելքումյանը կառավարությանն առաջարկում է Եվրասիական տնտեսական հանձնաժողովում վերաբանակցել ԵԱՏՄ անդամակցությամբ պայմանավորված երրորդ երկրներից մեքենաների ներմուծման մաքսատուրքերը բարձրացնելու հարցի վերաբերյալ:
«Արմենպրես»-ի հաղորդմամբ՝ Մելքումյանը նման տեսակետ հայտնեց ԱԺ ամբիոնից` աջ ղեկով մեքենաների ներմուծումը որոշակի ժամկետում թույլատրելու մասին նախագծի քննարկմանը:
«Հաջորդ տարվա հունվարի 1-ից ուժի մեջ են մտնելու եվրասիական մաքսատուրքերը, որոնք առնվազն 4.5 անգամ թանկացնելու են ավտոմեքենաները: Ես նաև ԲՀԿ-ի կողմից առաջարկում եմ մեր կառավարությանը հորդորենք, որ Եվրասիական տնտեսական հանձնաժողովի կոլեգիայում հիմիկվանից վերաբանակցեն՝ համապատասխան մաքսատուրքերը ժամանակավոր հետաձգելու առումով»,-ասաց Մելքումյանը:
Նա նշեց, որ հակառակ դեպքում Հայաստանը կկորցնի նվազագույնը մոտ 50 մլն դոլար:
ԵԱՏՄ անդամակցությամբ պայմանավորված երրորդ երկրներից Հայաստան ավտոտրանսպորտային միջոցների ներմուծման դեպքում մաքսային սակագների փոփոխություն է սպասվում 2020թ-ից:
Բաժանորդագրվեք մեր ալիքին Telegram-ում