Բուլղարիայում ՀՀ դեսպանը հանդիպում է ունեցել հայ հոգևորականների հետ
ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Բուլղարիայում ՀՀ դեսպանությունում մարտի 8-ին դեսպան Արմեն Սարգսյանը հանդիպել է Հայ Առաքելական եկեղեցու՝ Եվրոպայում ծառայող հայրապետական պատվիրակների, առաջնորդների և առաջնորդական տեղապահների հետ, որոնք Բուլղարիայում են գտնվում ՀԱԵ Եվրոպական թեմերի առաջին ժողովին մասնակցելու նպատակով:
Ինչպես «Արմենպրես»-ին տեղեկացրին ՀՀ ԱԳՆ լրատվության և հանրային դիվանագիտության վարչությունից, ողջունելով հյուրերին, դեսպան Սարգսյանը բարձր է գնահատել ժողովի անցկացման գաղափարը՝ կարևորելով հայապահպանմանն ուղղված Եվրոպայում ՀՀ դեսպանությունների և ՀԱԵ թեմերի միջև սերտ համագործակցության հետագա զարգացման անհրաժեշտությունը:
Արևմտյան Եվրոպայի Հայրապետական պատվիրակ, Վատիկանում Մայր Աթոռ Ս. Էջմիածնի պաշտոնական ներկայացուցիչ Խաժակ արքեպիսկոպոս Պարսամյանը ներկայացրել է ժողովի հիմնական նպատակներն ու քննարկվելիք շրջանակը: Նա կարևորել է Եվրոպական թեմերի միջև համագործակցության սերտացման անհրաժեշտությունը՝ հաշվի առնելով հայ եկեղեցու առջև ծառացած խնդիրներն ու մարտահրավերները:
Այս համատեքստում նա կարևորել է Եվրոպայի թեմերի առաջնորդների և եվրոպական երկրներում հավատարմագրված ՀՀ դեսպանների համատեղ հավաքի կազմակերպման անհրաժեշտությունը:
Հանդիպման ընթացքում քննարկվել են բուլղարահայ համայնքին առնչվող հարցեր, կապված, մասնավորապես, հայապահպանման, Հայաստանի հետ կապերի ամրապնդման և այլ խնդիրների հետ:
Բաժանորդագրվեք մեր ալիքին Telegram-ում