ԵՐԵՎԱՆ, 7 ՄԱՐՏԻ, ԱՐՄԵՆՊՐԵՍ: Աշխարհահռչակ սաքսոֆոնահար Ֆեդերիկո Մոնդելչին և ակորդեոնահար Սիմոնե Զանկինին հայ ունկնդրին խոստանում են երկու անմոռանալի համերգ ինքնատիպ ծրագրով: «Արմենպրես»-ի փոխանցմամբ  մարտի 7-ին լրագրողների հետ հանդիպմանը վստահեցրեցին երաժիշտները:

«Մարտի 9-ին Ֆեդերիկո Մոդելչին որպես սաքսոֆոնահար ելույթ կունենա Հայաստանի պետական կամերային նվագախմբի հետ, որը կղեկավարի գեղարվեստական ղեկավար և գլխավոր դիրիժոր  Վահան Մարտիրոսյանը, իսկ մարտի 13-ի համերգը կղեկավարի և որպես դիրիժոր հանդես կգա  Ֆեդերիկո Մոնդելչին, իսկ մենակատար կլինի  Սիմոնե Զանկինին, որը առաջին անգամ է Հայաստանում»,- ասաց Կամերային երաժշտության ազգային կենտրոնի տնօրեն Նորայր Նազարյանը:

Հայաստանի պետական կամերային նվագախմբի գեղարվեստական ղեկավար և գլխավոր դիրիժոր Վահան Մարտիրոսյանը տեղեկացրեց, որ առաջին համերգը կրում է «Անմոռանալի Beatles» խորագիրը, որտեղ զետեղված են Իտալական կինոյի երաժշտությունը, ինչպես նաև հանրահայտ լիվերփուլյան քառյակի՝ Beatles-ի սիրված ստեղծագործությունների մշակումները՝ կամերային նվագախմբի և սաքսոֆոնի համար, Բաբաջանյանի, Մորիկոնեի, Թարիվերդիևի, Մոլինելիի ստեղծագործությունները:

Ֆեդերիկո Մոնդելչին ներկայացրեց երկրորդ համերգի մանրամասները՝ շեշտելով, որ ներկայանալու են բոլորովին նոր ծրագրով: «Ես շատ ուրախ եմ կրկին Հայաստանում լինելու կապակցությամբ: Այս անգամ ես եկել եմ Հայաստան իմ ընկերներից Սիմոնե Զանկինիի հետ,  մենք բազմաթիվ ծրագրեր ենք իրականացնում միասին. սաքսոֆոն և ակորդեոն համադրությամբ»,-ասաց նա:

Երաժիշտները վստահեցնում են, որ հայ ունկնդրին հետաքրքիր համերգ է սպասվում:  Երկրորդ համերգին հնչելու են Բախի, Պիացոլայի, Գալիանոյի ստեղծագործությունները:

«Անհամբեր սպասելու եմ համերգին: Ինձ պատմել են, որ հայ հանդիսատեսը շատ ջերմ է, ուզում եմ տեսնել»,- հավելում է Սիմոնե Զանկինին:

Նա շեշտեց, որ որոշ ստեղծագործություններ կատարելու են Ֆեդերիկո Մոնդելչիի հետ միասին, որոշները՝ առանձին:

Երաժիշտները նաև նշեցին, որ շատ են սիրում հայկական երաժշտությունը՝ խոստովանելով, որ այստեղ  կա ինչ-որ հոգևոր բան:

Համերգները տեղի կունենան Արամ Խաչատրյանի համերգասրահում մարտի 9-ին և 13-ին:

Էլիզա Բալայան 

Սիմոնե Զանկինի, Ֆեդերիկո Մոնդելչի Նորայր Նազարյան, Վահան Մարտիրոսյան, Սիմոնե Զանկինի, Ֆեդերիկո Մոնդելչի Սիմոնե Զանկինի, Ֆեդերիկո Մոնդելչի Սիմոնե Զանկինի, Ֆեդերիկո Մոնդելչի Սիմոնե Զանկինի, Ֆեդերիկո Մոնդելչի Նորայր Նազարյան, Վահան Մարտիրոսյան, Սիմոնե Զանկինի, Ֆեդերիկո Մոնդելչի Սիմոնե Զանկինի, Ֆեդերիկո Մոնդելչի

Լուսանկարները` Մխիթար Խաչատրյանի