Նախագահ Սարգսյանն այցելել է անվանի ֆիզիկոս Դավիթ Սեդրակյանին և հանձնել ՀՀ պետական բարձր պարգևը
ԵՐԵՎԱՆ, 6 ՄԱՐՏԻ, ԱՐՄԵՆՊՐԵՍ: Հայաստանի Հանրապետության նախագահ Արմեն Սարգսյանի հրամանագրով գիտության ասպարեզում ներդրած ավանդի համար անվանի ֆիզիկոս, ՀՀ ԳԱԱ ակադեմիկոս, Երևանի պետական համալսարանի՝ ակադեմիկոս Վ. Համբարձումյանի անվան ընդհանուր ֆիզիկայի և աստղաֆիզիկայի ամբիոնի պատվավոր վարիչ Դավիթ Սեդրակյանը պարգևատրվել է «Հայրենիքին մատուցած ծառայությունների համար» 1-ին աստիճանի մեդալով։
Ինչպես «Արմենպրես»-ին հայտնեցին ՀՀ նախագահի աշխատակազմի հասարակայնության հետ կապերի վարչությունից, նախագահ Սարգսյանն այցելել է անվանի ֆիզիկոսին և հանձնել Հայաստանի Հանրապետության պետական բարձր պարգևը:
Արմեն Սարգսյանը ջերմ ու մտերմիկ զրույց է ունեցել իր վաղեմի դասախոսի հետ, հիշել համալսարանական ուսանողության տարիները և պրոֆեսոր Սեդրակյանի կարդացած հետաքրքիր դասախոսություններն, ինչպես նաև նրա հիմնած «Աստղաֆիզիկա» ամսագիրը։
Նշելով, որ ակադեմիկոս Սեդրակյանը կրթել, գիտելիք ու մասնագիտական հմտություններ է փոխանցել բազմաթիվ սերունդների՝ Հանրապետության նախագահը նրան մաղթել է առողջություն և ամենայն բարիք:
Բաժանորդագրվեք մեր ալիքին Telegram-ում