Տիգրան Մուկուչյանը կարևորում է նախընտրական քարոզչության եզրույթի սահմանումն Ընտրական օրենսգրքում
ԵՐԵՎԱՆ, 5 ՄԱՐՏԻ, ԱՐՄԵՆՊՐԵՍ: ՀՀ կենտրոնական ընտրական հանձնաժողովի նախագահ Տիգրան Մուկուչյանը կարևորում է, որ «նախընտրական քարոզչություն» եզրույթը ամրագրվի օրենքով: «Արմենպրես»-ի հաղորդմամբ` Մուկուչյանը նման տեսակետ հայտնեց ԱԺ-ում ունեցած իր ելույթում:
«Իմ քայլը» խմբակցության պատգամավոր Հերիքնազ Տիգրանյանը նկատեց, որ «նախընտրական քարոզչություն» եզրույթն Ընտրական օրենսգրքով սահմանված չէ, և խնդիրներ են առաջանում դրա ժամկետների հետ կապված:
«Նախընտրական քարոզչություն» եզրույթը պետք է ունենա օրենսդրական ձևակերպում: Սա շատ ավելի կարևոր է դառնում: Մենք ունենք նորմեր, որոնք զետեղված են Վարչական իրավախախտումների կամ Քրեական օրենսգրքերում, սակայն միայն դրանցով իրավական որոշակիության խնդիր է առաջանում»,- նշեց Մուկուչյանը:
Մուկուչյանը նշեց, որ տարբեր երկրներում տարբեր կերպ է սահմանվում նախընտրական քարոզչությունը: Կան երկրներ, որոնք մասնակցությանն ուղղված կոչերն անվանում են քարոզչություն, կան երկրներ, որոնք չեն համարում: «Դա նշանակում է, որ եզրույթը կարող է ունենալ որոշակի սահմաններ: Եվ ճիշտ է դրա ամրագրումը ԸՕ-ում»,- եզրափակեց ԿԸՀ նախագահը:
Բաժանորդագրվեք մեր ալիքին Telegram-ում