Համայնքների միության նախագահը վարչատարածքային փոփոխություններից առաջ ԱԺ անդամների կողմից մեխանիզմն օրենսդրորեն մեկնաբանելու կարիք է տեսնում
ԵՐԵՎԱՆ, 26 ՓԵՏՐՎԱՐԻ, ԱՐՄԵՆՊՐԵՍ: Հայաստանի համայնքների միության նախագահ Էմին Երիցյանը կարևորում է, որ վարչատարածքային ցանկացած փոփոխությունից առաջ Ազգային ժողովը հանրության համար օրենսդրորեն մեկնաբանի մեխանիզմը:
«Արմենպրես»-ի հաղորդմամբ՝ Երիցյանն այս մասին ասաց ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նիստում:
«Սահմանադրական փոփոխություններով ամրագրվել է իրավունք, որ համայնքների վարչատարածքային փոփոխությունների ժամանակ լսեն համայնքների կարծիքը։ Ցանկացած տիպի խոշորացումից առաջ պետք է այդ մեխանիզմը նախապես օրենսդրորեն մեկնաբանել: Սա առաջնահերթ խնդիր է, և սա ԱԺ-ի լիազորություններին է վերաբերում: Եվ դա պետք է կարգավորվի Ազգային ժողովի կանոնակարգ օրենքով: Կարծում եմ՝ պետք է սրան անպայման անդրադառնալ»,-ասաց Երիցյանը:
Նա նշեց, սակայն. «Սա չպետք է փոխարինի կառավարության՝ համայնքների հետ խորհրդակցելու մեխանիզմին»: Համայնքների միության նախագահը կարևորեց, որ կառավարությունը հենց նախաձեռնելու պահից խորհրդակցի համայնքների հետ:
Բաժանորդագրվեք մեր ալիքին Telegram-ում