Հայկական ընկերությունը ավանդական զարդանախշերով զգեստների հավաքածուով մասնակցել է միջազգային նորաձևության ցուցահանդեսի
ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ: Հայկական ընկերությունն Իրանի 8-րդ «Ֆաջր» միջազգային նորաձևության և հագուստի փառատոնին ներկայացել է ավանդական զարդանախշերով զգեստների հավաքածուով: Փառատոնի բացման արարողությունը տեղի է ունեցել փետրվարի 14-ին՝ Չաբահար քաղաքում: Ինչպես «Արմենպրես»-ին տեղեկացրին ՀՀ-ում ԻԻՀ դեսպանության մշակույթի կենտրոնից, Հայաստանը ներկայացնող «Taraz.am» նորաձևության կենտրոնի ներկայացուցիչները շատ գոհ են ջերմ ընդունելությունից և միջազգային ստանդարտներին համապատասխան բարձր մակարդակով կազմակերպումից: Հայաստանի ներկայացուցիչները, հանդես գալով առանձին տաղավարով, ցուցադրել են հայկական նախշեր պարունակող զգեստներ, պայուսակներ և կոշիկներ:
«Ֆաջր» միջազգային 8-րդ փառատոնի թեմատիկան բավականին ընդգրկուն է՝ նորաձևության վարպետաց դասերի կազմակերպում, այդ թվում՝ Սիստանև Բելուչիստան նահանգի կանանց ասեղնագործ աշխատանքների հատուկ վարպետաց դասի անցկացում բոլոր մասնակիցների համար, տարբեր ազգային զգեստների և տիկնիկների ցուցադրում, գրքին, խաղաղությանը և Պարսից ծոցին առնչվող թեմաների ներկայացում:
Բաժանորդագրվեք մեր ալիքին Telegram-ում