ԵՐԵՎԱՆ, 15 ՓԵՏՐՎԱՐԻ, ԱՐՄԵՆՊՐԵՍ: Վարչապետի աշխատակազմից զատ ծառայողական մեքենաները կկրճատվեն նաև մյուս պետական գերատեսչություններում: Այդ մասին կառավարության նիստից հետո լրագրողների հետ զրույցում նշեց վարչապետի աշխատակազմի ղեկավար Էդուարդ Աղաջանյանը:

«Վարչապետի կողմից համապատասխան հանձնարարություն է տրվել արդեն կառավարությանը ենթակա մարմիններին, իսկ կառավարությանը ոչ ենթակա մարմիններին այդ մասին առաջարկություն է ուղարկվել: Տեղյակ եք, որ մոտ երկու շաբաթ առաջ վարչապետի աշխատակազմը ավտոմեքենաների կտրուկ կրճատման որոշում է կայացրել: Ինչպես նշել էինք՝ այս որոշումը լոկալ բնույթ չի կրելու և պետք է տարածվի բոլոր պետական մարմինների վրա »,-  «Արմենպրես»-ի փոխանցմամբ, ասաց Աղաջանյանը:

Նա նշեց, որ հաշվի առնելով այն, որ այս պահին դեռևս արձագանքներ չունեն պետական գերատեսչություններից, դժվար է ասել, թե քանի տոկոսով կկրճատվի ավտոպարկը: «Բայց տրամաբանությունն այն է, որ ամեն գերատեսչությունում նախարարից բացի այլ պաշտոնյա իրեն կցված ավտոմեքենա պետք է չունենա: Խոսքը գնում է ֆիքսված ավտոմեքենայի մասին, որը միայն տվյալ պաշտոնյային պետք է սպասարկի»,- ասաց նա: