ԵՐԵՎԱՆ, 13 ՓԵՏՐՎԱՐԻ, ԱՐՄԵՆՊՐԵՍ: Ազգային ժողովի «Բարգավաճ Հայաստան» խմբակցությունը կառավարության ներկայացրած ծրագրի վերաբերյալ երեք առաջարկ ունի, որի ընդունումից կամ մերժումից էլ պայմանավորված կլինի խմբակցության քվեարկությունը: «Արմենպրես»-ի փոխանցմամբ՝ այս մասին փետրվարի 13-ին Ազգային ժողովում լրագրողների հետ զրույցում հայտնեց խմբակցության անդամ Միքայել Մելքումյանը:

«Առաջինը՝ պետք է ձևակերպել ծրագրի կատարման ռիսկերն ու երաշխիքները, երկրորդը՝ ծրագրի մեջ լրացնել համապատասխան ժամանակացույց, ըստ տարիների, երրորդը՝ պետք է անպայման ծրագրի կատարման իրականացման մեխանիզմները լինեն»,- ասաց Մելքումյանը:

Պատգամավորի խոսքով՝ իրենք Ազգային ժողովի նախագահի առաջարկելու են խմբակցությունների ներկայացուցիչների ու կառավարության անդամների միջև հանդիպում կազմակերպել, որտեղ էլ կներկայացնեն իրենց առաջարկները:

«Չեմ կարծում, որ այդ մեխանիզմը չկա, մենք կառաջարկենք ԱԺ նախագահին, որպեսզի նրա սենյակում հավաքվեն կառավարության անդամներն ու խմբակցությունների ղեկավարները, և մենք կարողանանք կառավարությանը ներկայացնել մեր առաջարկները: Եթե դրանք ընդունվեն, մենք կողմ կքվեարկենք, եթե ոչ, ապա կներկայացնենք մեր համապատասխան դիրքորոշումը»,- նշեց Միքայել Մելքումյանը:

Փետրվարի 8-ին տեղի ունեցած Կառավարության նիստում գործադիրը հաստատեց իր ծրագիրը:

Փետրվարի 12-ին Ազգայի ժողովի նիստում ՀՀ վարչապետ Նիկոլ Փաշինյանը ներկայացրեց կառավարության հաստատված ծրագիրը: Գործադիրի ղեկավարին հարց տալու համար հերթագրվել էր 53 պատգամավոր:

Հայաստանի Հանրապետության կառավարության ծրագիրը ներառում է հետևյալ բաժինները.

Հայաստանի Հանրապետության կառավարության գործունեության հիմնարար ուղենիշերը, Արտաքին և ներքին անվտանգության ապահովումը (պաշտպանության ոլորտի քաղաքականություն, ներքին անվտանգություն, արտաքին քաղաքականություն, սփյուռքի հետ կապեր), Պայքար կոռուպցիայի դեմ (հանրային ծառայության մեջ գտնվող անձանց գործունեության, գույքի և եկամուտների թափանցիկություն, հանրային կառավարում, տնտեսական գործունեության թափանցիկություն), Ազատ, արժանապատիվ և երջանիկ քաղաքացի (օրենքի առջև բոլորի հավասարություն, արդարադատություն և մարդու իրավունքների պաշտպանություն, աղքատության հաղթահարում, սոցիալական պաշտպանություն և ժողովրդագրություն, առողջապահություն, կրթություն և գիտություն, մշակույթ, սպորտ, երիտասարդություն, շրջակա միջավայր), Մրցունակ, մասնակցային և ներառական տնտեսություն (տնտեսական քաղաքականությունը և քաղաքացու բարեկեցությունը, ստեղծարար ներուժի ընդլայնումը և իրացումը, մրցունակ և մասնակցային տնտեսություն, գործարար միջավայր, ներքին շուկաների ազատություն, արդար մրցակցություն, արտահանումը՝ տնտեսական աճի հիմնական շարժիչ, ներդրումների աճը՝ մրցունակության և կայուն աճի նախապայման, զբոսաշրջություն, ՓՄՁ զարգացումը՝ ներառական տնտեսական աճի նախադրյալ, վերամշակող արդյունաբերություն, գյուղատնտեսություն), Տարածքային կառավարում, տեղական ինքնակառավարում և ենթակառուցվածքներ (տարածքային կառավարում և տեղական ինքնակառավարում, էներգետիկ բնագավառ, հանքարդյունաբերության ոլորտ, ջրային տնտեսություն, տրանսպորտ, պետական գույքի կառավարում, միգրացիա), Բարձր տեխնոլոգիաներ, թվայնացում և ռազմարդյունաբերություն (բարձր տեխնոլոգիաներ, կապ և թվայնացում), Պետական ֆինանսների կառավարում (հարկային համակարգ, պետական ծախսեր):

Հայաստանի Հանրապետության Սահմանադրության 151-րդ հոդվածի 2-րդ մասի համաձայն՝ Ազգային ժողովը Կառավարության ծրագրին հավանություն է տալիս յոթնօրյա ժամկետում` պատգամավորների ընդհանուր թվի ձայների մեծամասնությամբ: