Մի խումբ գրողներ Բանակի տոնի առթիվ արժանացան մրցանակների
ԵՐԵՎԱՆ, 25 ՀՈՒՆՎԱՐԻ, ԱՐՄԵՆՊՐԵՍ: Հայաստանի գրողների միությունը, ՀՀ պաշտպանության նախարարության և Երկրապահ կամավորականների միության հետ համատեղ Ազգային Բանակի տոնի առթիվ մրցանակներ հանձնեց մի խումբ գրողների գեղարվեստական արձակ, պոեզիա և այլ անվանակարգերում:
«Արմենպրես»-ի հաղորդմամբ` մրցանակաբաշխությունն անցկացվեց հունվարի 25-ին Հայաստանի գրողների միությունում:
«Բանակի 27-րդ տարեդարձին սա մեր լավագույն մասնակցությունը կարող է լինել գրական գործերով, աշխատանքներով: Գրողները միշտ իրենց գործերում խոսել են բանակ, պետականություն ունենալու բաղձանքի մասին: Բարեբախտաբար մենք այն ունեցանք»,-նշեց Գրողների միության նախագահ Էդվարդ Միլիտոնյանը:
Նա հավելեց, որ ժամանակակից գրողներն իրենց ստեղծագործություններով մասնակցել են և բանակաշինությանը և պետականաշինությանը և այսօր իրենց գործերով բորբոքուն են պահում հայոց զինագործ, զինավառ ոգին:
Գեղարվեստական արձակ անվանակարգում առաջին մրցանակը շնորհվեց Գրիգոր Ջանիկյանին՝ «Սպարտակ՝ վիպասք 80-ամյա արծիվ-մահապարտի մասին» գրքի համար:
«Չնայած գրքի հեղինակը ես եմ, բայց մրցանակին արժանացել է գրքի հերոսը` Սպարտակ Մաթևոսյանը, որը մեծ վաստակ ու ներդրում ունի երկրի կյանքում: Նա սկսել է իր գործունեությունն այն տարի, երբ սկսվեց ազատագրական շարժումը. հրապարակում ցույցեր էին հողերի պահանջով: Երբ Վազգեն Սարգսյանը կոչ արեց մահապարտների գումարտակ կազմակերպել, 53-ամյա Սպարտակը թողեց իր հինգ աղջիկներին և կնոջը և կամավոր գնաց պատերազմ»,-պատմեց Գրիգոր Ջանիկյանը և հավելեց, որ 78 տարեկանում Սպարտակը կամավոր մասնակցել է նաև Ապրիլյան պատերազմին ու փառքով, պատվով վերադարձել տուն:
Երկրորդ մրցանակի արժանացան Հովիկ Գրիգորյանը «Արարատի կանչող լույսը» գրքի համար և Սաթենիկ Ղազարյանը մամուլում տպագրած պատմվածքների համար, երրորդ մրցանակը տրվեց Երվանդ Վարդանյանին՝ «Անհետացող դաշտերի քարտեզը» պատմվածքի համար և Սալբի Թաշճեանին «Վերջին այցելութիւն...» պատմվածքի համար:
Պոեզիա անվանակարգում առաջին մրցանակը ստացան Նոնա Պողոսյանը և Կորյուն Առաքելյանը բանաստեղծական շարքի համար: Երկրորդ մրցանակը հանձնվեց Գոհար Գալստյանին և Սուրեն Դավթյանին բանաստեղծական շարքի համար:
«Այս գործը նվիրել եմ 2016 թվականի Ապրիլյան հերոսամարտին մասնակցած զինվորների հիշատակին: Նկարագրվում են նրանց հերոսական արարքները, առօրյան, կյանքն այնպիսին, ինչպիսին որ կա»,-ներկայացրեց Սուրեն Դավթյանը:
Անդրադառնալով մրցանակին` գրողը խոստովանեց, որ այն պարտավորեցնող է, ունի մեծ խորհուրդ: «Ի վերջո պատերազմը միայն կռվի դաշտում չէ, այն մեր կյանքում է, և գրողը զինվորներից մեկն է»,-եզրափակեց նա:
Նույն անվանակարգում երրորդ տեղի մրցանակը տրվեց Սամուել Վեմին՝ «Ձմեռը երկնքում չի մնա» գրքի համար:
Հրապարակագրություն, գրաքննադատություն անվանակարգում մրցանակի արժանացավ Ռուզան Ասատրյանը «Վավերագիր» գրքի համար:
Հայոց բանակին նվիրված գրական-տեսական աշխատություն մրցանակը տրվեց Ժաննա Հակոբյանին՝ «Հայի գենը» գրքի համար և Ֆելիքս Բախչինյանին՝ «Հոգին ավելին է, քան արտացոլանքը» հրապարակման համար:
Հատուկ մրցանակներ շնորհվեցին Արտեմ Հարությունյանին և Վարդան Հակոբյանին:
ԵԿՄ մրցանակը հանձնվեց Էդուարդ Խաչիկյանին:
Մրցանակաբաշխությանը մասնակցած մի խումբ հեղիակների տրվեցին խրախուսական մրցանակներ, մասնակցության համար մի քանի գրողի հանձնվեցին պատվոգրեր:
Մրցանակաբաշխությունն անցկացվեց հինգերորդ անգամ:
Բաժանորդագրվեք մեր ալիքին Telegram-ում