ԵՐԵՎԱՆ, 25 ՀՈՒՆՎԱՐԻ, ԱՐՄԵՆՊՐԵՍ: Թուրքմենստանում ՀՀ դեսպան Գառնիկ Բադալյանը հունվարի 24-ին հանդիպել է Թուրքմենստանի կառավարության պետական նախարար, «Թուրքմենգազ» պետական կոնցեռնի նախագահ Մուրադ Արչաևի (Murad Archayev) հետ:

Ինչպես «Արմենպրես»-ին տեղեկացրին ՀՀ ԱԳՆ լրատվության և հանրային դիվանագիտության վարչությունից, հանդիպման սկզբում պետնախարար Արչաևը շնորհավորել է և բարի երթ մաղթեց ՀՀ դեսպանին՝ տեղեկացնելով, որ Թուրքմենստան–Հայաստան միջկառավարական հանձնաժողովի համանախագահությունը Թուրքմենստանի էներգետիկայի նախարարությունից փոխանցվել է «Թուրքմենգազ» պետական կոնցեռնի նախագահին: Զրույցի ընթացքում կողմերը քննարկել են երկկողմ հարաբերություններին առնչվող հարցերի լայն շրջանակ, այդ թվում՝ Թուրքմենստանից Հայաստան գազի առաքման և Աշխաբադ-Երևան օդային թռիչքների վերականգնման հնարավորությունները:

Գառնիկ Բադալյանը շնորհավորել է պետնախարար Արչաևին համատեղ հանձնաժողովի համանախագահությունը ստանձնելու համար և հույս հայտնել, որ հայկական կողմի համանախագահի նշանակումից հետո Թուրքմենստանի հետ Հայաստանի ունեցած հարաբերությունների բարձր մակարդակը հնարավորություն կտա սերտացնել երկկողմ տնտեսական կապերը:

Զրուցակիցները պայմանավորվել են Աշխաբադում 2019թ. առաջին կիսամյակում կայանալիք համատեղ հանձնաժողովի 9-րդ նիստը պատշաճ մակարդակով անցկացնելու համար նշանակել կապի գծով պատասխանատուների: