Գեղարքունիքի մարզի համայնքները հաշվետվություններ են ներկայացնում բյուջետային ծախսերի վերաբերյալ
ԳԱՎԱՌ, 24 ՀՈՒՆՎԱՐԻ, ԱՐՄԵՆՊՐԵՍ: Գեղարքունիքի մարզի բոլոր համայնքների ղեկավարները հունվար ամսվա ընթացքում, ըստ մարզպետարանում կազմված ժամանակացույցի, իրենց համայնքների 5-ամյա զարգացման ծրագրերի շրջանակում հաշվետվություն են ներկայացնում 2018 թվականի բյուջեների ծախսային մասի վերաբերյալ:
Ինչպես «Արմենպրես»-ին տեղեկացրին Գեղարքունիքի մարզպետարանի տեղական ինքնակառավարման եւ հանրապետական գործադիր մարմիների հարցերով վարչությունից, հաշվետվություններն անցնում են Գեղարքունիքի մարզպետի, մարզպետի տեղակալների, մարզպետարանի ստորաբաժանումների ղեկավարների մասնակցությամբ:
Հունվարի 24-ի դրությամբ արդեն հաշվետվություններն ավարտվել են քաղաքային եւ գյուղական խոշոր համայնքներում, իսկ դրանց ավարտի ժամկետ է ընդունված հունվարի 29-ը: Հաշվետվություններին մասնակցում են ավագանու անդամները, համայնքի բնակիչները: «Այս ձևաչափով հաշվետվությունները կարելի է նաեւ հանրային լսում համարել: Այն նպատակ ունի՝ ցույց տալ հանրությանը, թե ինչ ուղղությամբ են ծախսվել իրենց կողմից վճարած հարկերից գոյացած գումարները, նպատակայի՞ն են արդյոք դրանք, թե ոչ: Այս գործընթացը համայնքային բյուջեների ծախսման ողջ գործընթացը թափանցիկ դարձնելու նպատակ ունի, իսկ հանրությունը այս կերպ ավելի իրազեկ կլինի եւ իր մասնակցությունը կունենա սեփական եկամուտների արդյունավետ եւ նպատակային օգտագործմանը: Ցանկալի կլինի, որպեսզի այս հաշվետվությունները ավելի մանրամասնորեն ներկայացվեն, իսկ դրանց հրավիրվեն ավելի շատ թվով մարդիկ, հատկապես նրանք, ովքեր իրենց դժգոհությունն են արտահայտում տեղական ինքնակառավարման մարմինների գործունեությունից: Սակայն այս գործընթացը կրելու է շարունակական բնույթ, եւ նախատեսել ենք, որպեսզի մարզի համայնքների ղեկավարները նմանատիպ հաշվետվություններով հանդես գան յուրաքանչյուր եռամսյակի ավարտին, որպեսզի հանրությունը տեղեկանա, թե համայնքի առջեւ ծառացած խնդիրները ինչ միջոցներով եւ ինչպես են լուծվում»,- «Արմենպրես»-ի հետ զրույցում նշեց մարզպետ Գնել Սանոսյանը:
Խոսրով Խլղաթյան
Բաժանորդագրվեք մեր ալիքին Telegram-ում