Եվրամիությունը պահանջում Է անհապաղ քաղաքական գործընթաց սկսել Վենեսուելայում. Մոգերինի
ԵՐԵՎԱՆ, 24 ՀՈՒՆՎԱՐԻ, ԱՐՄԵՆՊՐԵՍ: Եվրամիությունն անհապաղ քաղաքական գործընթաց սկսելու կոչ Է անում, որը Վենեսուելայում կբերի ազատ ընտրությունների: Այս մասին, ինչպես տեղեկացնում Է «Արմենպրես»-ը, ասված Է Եվրոպայի դիվանագիտության ղեկավար Ֆեդերիկա Մոգերինիի հայտարարության մեջ, որը հունվարի 24-ին հրապարակվել Է ԵՄ-ի խորհրդի կայքում:
«Եվրամիությունն անհապաղ քաղաքական գործընթաց սկսելու հաստատակամ կոչ Է անում, որը կհանգեցնի ազատ եւ վստահության արժանի ընտրությունների՝ սահմանադրական կարգին համապատասխան»,- նշվում Է հայտարարության մեջ:
Մոգերինին նշել Է, որ Եվրամիությունը լիովին պաշտպանում Է «Ազգային ասամբլեան՝ որպես ժողովրդավարական ճանապարհով ընտրված ինստիտուտ, որի լիազորություններն անհրաժեշտ Է վերականգնել եւ հարգել»: Հունվարի 23-ին ավելի վաղ Վենեսուելայի ընդդիմադիր Ազգային ասամբլեայի (միապալատ խորհրդարանի) խոսնակ Խուան Գուայդոն իրեն հայտարարել Է երկրի նախագահի պաշտոնակատար:
Քաղաքական գործչին արդեն Վենեսուելայի ժամանակավոր ղեկավար են ճանաչել ԱՄՆ-ը, Կանադան, Արգենտինան, Բրազիլիան, Չիլին, Կոլումբիան, Պարագվայը, Պերուն եւ Ամերիկյան պետությունների կազմակերպությունը: Նախագահ Նիկոլաս Մադուրոն դա որակել Է Վաշինգտոնի կազմակերպած պետական հեղաշրջում եւ հայտարարել ԱՄՆ-ի հետ դիվանագիտական հարաբերությունները խզելու մասին: Երկրի բազմաթիվ քաղաքներում սկսվել են ընդդիմության բողոքի ակցիաներ, որոնք արդեն վերաճել են ոստիկանության եւ Ազգային գվարդիայի հետ ընդհարումների, որոնց հետեւանքով կան զոհեր, հաղորդել Է ՏԱՍՍ-ը:
Բաժանորդագրվեք մեր ալիքին Telegram-ում