ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ:  Գրող, բանաստեղծուհի, հասարակական գործիչ Սիլվա Կապուտիկյանի ծննդյան 100-ամյակի նրան նվիրված միջոցառումների շրջանակում «ՀայՓոստ» ՓԲԸ-ի կողմից մարվեց և շրջանառության մեջ դրվեց մեծանուն գրողի նամականիշը: Մարման հանդիսավոր արարողությունն անցկացվեց հունվարի 22-ին Հայաստանի գրողների միությունում:

«Կապուտիկյանը, խորապես ճանաչելով իր և իր ժողովրդի անցյալը, կենսագրությունը, իր ստեղծագործություններում արտահայտեց հայի ճակատագիրը, հայ մարդու կեցությունը, ընթացիկ կյանքի խնդիրները, հասարակական, քաղաքական հնչեղություն ունեցող հարցերը »,-«Արմենպրես»-ի հաղորդմամբ` նշեց գրողների միության նախագահ Էդվարդ Միլիտոնյանը:

Նրա խոսքով` Կապուտիկյանը հայ կնոջ, հայ մոր, մայրիշխանությունից եկած արթուն բնազդով մարդ էր, որը ցանկանում էր պահպանել երկիրը, հայ քաղաքացուն, սատարել սփյուռքահայերին: «Նրա «Խոսք իմ որդուն»  ստեղծագործությունը դարձավ Սփյուռքի լեզվապահպանման հիմքը»,-շեշտեց Միլիտոնյանը:

120 ՀՀ դրամ անվանական արժեքով նամականիշը տպագրված է Ֆրանսիայի «Cartor» տպագրատանը`30 000 տպաքանակով: Նամականիշի դիզայնի հեղինակն է «ՀայՓոստ» ՓԲԸ-ի դիզայներ Դավիթ Դովլաթյանը:

Նամականիշի վրա պատկերված է Սիլվա Կապուտիկյանը` իր հերթական ստեղծագործության վրա աշխատելիս:

Թողարկման օրը` 22 հունվարի 2019թ.

Դիզայնը` Դավիթ Դովլաթյան

Տպարանը` Cartor, Ֆրանսիա

Չափսերը` 30,0 x 40,0 մմ

Տպաքանակը` 30 000 հ.

Նաթան Սրբազան Գագիկ Նահապետյան Էդվարդ Միլիտոնյան

Լուսնկարները` Էդուարդ Սեպետչյանի