Սփյուռքի և մշակույթի նախարարություններ ունենալու հարցում արվեստագետների տեսակետները տարբեր են
ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: Հուշարձանագետ Սամվել Կարապետյանը և քանդակագործ Լևոն Թոքմաջյանը հակադիր կարծիքներ ունեն ՀՀ մշակույթի և սփյուռքի նախարարությունների հնարավոր կրճատման կամ դրանց այլ նախարարություններին կցելու վերաբերյալ: Ըստ Սամվել Կարապետյանի` նախարարությունները պետք է ընդլայնվեն ու համալրվեն: Թոքմաջյանի համոզմամբ` դրանք կարող են արդյունավետ աշխատել անգամ վարչության կարգավիճակում:
«Արմենպրես»-ի փոխանցմամբ` այս մասին նրանք հայտնեցին հունվարի 22-ին լրագրողների հետ հանդիպմանը:
«Ըստ իս` Սփյուռքի նախարարության գոյության կենսական պահանջ կա: Այլ հարց է, որ այն պետք եղած արդյունավետությամբ չէր աշխատում, հետևաբար անհրաժեշտ էր նախարարությունն ավելի հզորացնել, կարգի բերել: Այն պակաս բաժիններ ուներ: Եթե մի կառույց այնքան էլ լավ չի աշխատում, ոչ թե պետք է ուղղակի վերացնել, այլ պետք է հասկանալ, թե ինչո՞ւ է վատ աշխատում: Նույնը կասեմ նաև ՀՀ մշակույթի նախարարության մասին, որին ավելի մոտ եմ կանգնած եղել, համագործակցել այդ կառույցի հետ»,-նշեց Կարապետյանը:
Նա շեշտեց, որ Մշակույթի նախկին նախարարների հետ զրուցել է տարբեր հիմնախնդիրների մասին, նրանք կիսել են իր մտահոգությունները, բայց գործնականում հարցերը լուծում չեն ստացել: «Մենք ունենք հարևան չորս երկիր և միայն Իրանում են պետական մակարդակով քաղաքակիրթ վերաբերմունք ցույց տալիս մեր հուշարձանների նկատմամբ: Մյուս հարևան երկրների տարածքում հայկական հուշարձանները քողարկված կամ բացահայտ կերպով պետական ծրագրով ենթակա են ոչնչացման: Ադրբեջանը մեր հուշարձանների վերաբերյալ հրատարակում է նյութեր` փորձելով հիմնավորումներ ներկայացնել այն մասին, որ իբր դրանք ոչ թե հայկական են, այլ աղվանական»,-պատմեց հուշարձանագետը:
Նա հավելեց, որ վրացիները նյութեր են հրատարակում, որոնցում նշվում է, որ հայաստանյան գավառների հուշարձանները բացարձակ կապ չունեն հայերի հետ:
«Իմ պատկերացմամբ` ՀՀ մշակույթի նախարարությունը պետք է ունենա բաժիններ, որոնք պատասխան կտան այդ ոտնձգություններին: Մենք տոտալ հարձակման ենք ենթարկվում, բայց լռում ենք»,-եզրափակեց Կարապետյանը:
Ի տարբերություն հուշարձանագետի` Լևոն Թոքմաջյանն ասաց, որ ինքը դեմ չէ, որ ՀՀ մշակույթի նախարարությունը դառնա վարչություն: «Թող դառնա վարչություն միայն թե աշխատի: Կարծում եմ` քանակը որակ չի ստեղծում: Թող լինեն յոթ կամ տասը աշխատակիցներ, բայց իմանան, թե ինչ են անում հանրության, արվետագետների և վարչության կապն ամրապնդելու համար: Պետք է որոշակի տրամաբանություն լինի այդ հարաբերություններում»,-շեշտեց նա:
Անդրադառնալով Սփյուռքի նախարարությանը` քանդակագործն ընդգծեց, որ համամիտ չէ Սամվել Կարապետյանի այն ասածին, թե նախարարությունը պետք է ավելի ընդգրկուն դառնա: «Այստեղ նույնպես կարող է աշխատել տասը մարդ, բայց այնպես, որ Հայաստանի և Սփյուռքի մերձեցումն ավելի ջերմ լինի»,-նկատեց Թոքմաջյանը:
ՀՀ կառավարությունը «Կառավարության կառուցվածքի և գործունեության մասին» օրենքում նախատեսել է փոփոխություններ, որոնց համաձայն՝ ենթադրվում է, որ ՀՀ մշակույթի նախարարությունը կարող է միանալ ՀՀ կրթության և գիտության նախարարությանը, իսկ ՀՀ սփյուռքի նախարարությունը հնարավոր է, որ լուծարվի և ՀՀ արտաքին գործերի նախարարությունում գործի որպես վարչություն:
Բաժանորդագրվեք մեր ալիքին Telegram-ում