Անատոլի Կարպովը շախմատի ներկայիս խնդիրներից է համարում ժամանակակից տեխնոլոգիաների օգտագործումը
ԵՐԵՎԱՆ, 21 ՀՈՒՆՎԱՐԻ, ԱՐՄԵՆՊՐԵՍ: Շախմատի աշխարհի չեմպիոն, միջազգային գրոսմայստեր Անատոլի Կարպովը բացառում է շախմատում դոպինգի կիրառումը և մարզաձևի ներկայիս խնդիրներից է համարում ժամանակակից տեխնոլոգիաների օգտագործումը:
«Արմենպրես»-ի հաղորդմամբ՝ այս մասին Կարպովն ասաց հունվարի 21-ին կազմակերպված տեսակամրջի ժամանակ լրագրողների և երիտասարդ շախմատիստների հետ հանդիպման ընթացքում:
«Շախմատում երբևէ չեն եղել դոպինգ սկանդալներ: Դոպինգ ստուգումներ նույնպես չեն եղել և չեն էլ կարող լինել: ՖԻԴԵ-ի նախկին նախագահ Կիրսան Իլյումժինովը փորձում էր դոպինգ ստուգումներ իրականացնել շախմատիստների շրջանում, սակայն դա ավելի շատ ցուցադրական բնույթ էր կրում՝ կարծես ցանկանալով հասկացնել տալ, որ շախմատը նույնպես սպորտի աշխարհից է»,- նշեց Կարպովը:
Նրա խոսքով ՝ շախմատի ներկայիս խնդիրը ժամանակակից տեխնոլոգիաների օգտագործումն է, քանի որ կա լուրջ վտանգ, որ շախմատիստները կօգտվեն դրանցից և կփորձեն այդպիսով ինֆորմացիա ստանալ մրցակիցների մասին: Կարպովն ընդգծեց, որ ՖԻԴԵ-ն շատ լուրջ պայքարում են դրա դեմ և խստորեն պատժում խարդախության մեջ բռնված շախմատիստներին՝ երկարաժամկետ որակազրկման կամ միջազգային մրցույթների մասնակցությունն արգելելու միջոցով:
Բաժանորդագրվեք մեր ալիքին Telegram-ում