Ժամանակը Երևանում՝ 11:07:36,   19 Փետրվար

ՀՀ ԿԲ-ն հրապարակել է դեկտեմբերի 25-ի խորհրդի նիստի Տոկոսադրույքի արձանագրությունը և Տոկոսադրույքների որոշումը


ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: ՀՀ կենտրոնական բանկը հրապարակել է դեկտեմբերի 25-ի խորհրդին նիստի վերաբերյալ Տոկոսադրույքի արձանագրությունը և նույն նիստում հաստատված ԿԲ գործիքների տոկոսադրույքների վերաբերյալ որոշումը, ըստ որի՝ Հայաստանի Հանրապետության կենտրոնական բանկի վերաֆինանսավորման տոկոսադրույքը թողնվել է անփոփոխ՝ 6.0%, ԿԲ կողմից տրամադրվող լոմբարդային ռեպոյի տոկոսադրույքը սահմանվել է 7.5%, իսկ ԿԲ կողմից բանկերից ներգրավվող միջոցների տոկոսադրույքը` 4.5%: Այս մասին «Արմենպրես»-ին տեղեկացրին ԿԲ հասարակայնության հետ կապերի ծառայություն։

Հաղորդագրության մեջ նշված է. «2018 թ. դեկտեմբերի 25-ի ՀՀ ԿԲ խորհրդի նիստին մասնակցում էին` ՀՀ ԿԲ նախագահ Արթուր Ջավադյանը, ՀՀ ԿԲ նախագահի տեղակալներ Ներսես Երիցյանը, Վախթանգ Աբրահամյանը, խորհրդի անդամներ Աշոտ Մկրտչյանը, Արթուր Ստեփանյանը, Արմենակ Դարբինյանը, Օլեգ Աղասյանը, Մարտի Գալստյանը:

Խորհրդի նիստը սկսվեց դեկտեմբերի 25-ի դրությամբ Իրավիճակային հաշվետվության ներկայացմամբ: Քննարկվեցին գնաճի, արտաքին միջավայրի, իրական, հարկաբյուջետային և դրամավարկային հատվածների զարգացումները:

Արձանագրվեց, որ 2018 թ-ի նոյեմբերին ևս դիտվել է ամսվա սեզոնայնության համեմատ ցածր գնաճ՝ 1.0%, որը հիմնականում պայմանավորվել է «Միրգ» և «Բանջարեղեն» ապրանքախմբերի գների փոփոխություններով, որոնց ընդհանուր նպաստումը 12-ամսյա գնաճին կազմել է -0.3 տոկոսային կետ: Արդյունքում, նոյեմբերի վերջին 12-ամսյա գնաճը կազմել է 1.8%: Միաժամանակ, բնականոն գնաճը նոյեմբերին նույնպես նվազել է՝ կազմելով տ/տ 2.8%, քանի որ արձանագրվել են մի շարք ապրանքատեսակների գների՝ տարեվերջի սեզոնային դրսևորումների համեմատ ավելի ցածր մակարդակներ, ինչը պայմանավորված է գնահատվող թույլ ներքին պահանջարկով:

Խորհուրդն անդրադարձավ ձևավորված տնտեսական միջավայրին. նշվեց, որ  2018 թ-ի չորրորդ եռամսյակի փաստացի արդյունքների համաձայն, պահպանվել է տնտեսական ակտիվության թուլացման միտումը՝ հիմնականում պայմանավորված գյուղատնտեսության ճյուղի և հանքարդյունաբերության ենթաճյուղի թողարկման ծավալների նվազմամբ: Դրա հետևանքով նախորդ տարվա նույն ժամանակահատվածի նկատմամբ հունվար-նոյեմբերի տնտեսական ակտիվության ցուցանիշը կազմել է 5.7%, իսկ տարեկան տնտեսական աճը գնահատվում է 5.0%-ի շրջակայքում: Դրան համապատասխան, չորրորդ եռամսյակում ներքին պահանջարկը ևս մնում է թույլ՝ պայմանավորված հարկաբյուջետային քաղաքականության զսպողական բնույթով և մասնավոր ծախսումների աճի որոշ չափով դանդաղմամբ:

Խորհրդի նիստում ներկայացվեցին արտաքին հատվածի զարգացումները, որոնց համաձայն՝ չորրորդ եռամսյակում համաշխարհային տնտեսական զարգացումներն ընթացել են սպասվածին համապատասխան, իսկ ապրանքահումքային միջազգային շուկաներում պահպանվել է գնաճային միջավայրի թուլացման միտումը: Միևնույն ժամանակ, շարունակվում է առաջատար երկրների կենտրոնական բանկերի կողմից դրամավարկային պայմանների խստացումը:

Խորհրդի նիստում քննարկվեցին ֆինանսական շուկայի զարգացումները և արձանագրվեց, որ տարեվերջին շուկայի տարբեր հատվածներում դիտվել են հիմնականում կայուն միտումներ, և տոկոսադրույքները պահպանվել են քաղաքականության տոկոսադրույքի շրջակայքում:

Իրավիճակային հաշվետվության և արտաքին ու ներքին մակրոտնտեսական զարգացումների վերաբերյալ քննարկումից հետո Խորհուրդն անցավ դրամավարկային քաղաքականության ուղղությունների քննարկմանն ու քաղաքականության տոկոսադրույքի որոշման կայացմանը: Խորհուրդն անդրադարձավ գնաճի վրա ազդող մի շարք գործոնների, այդ թվում՝ տարեսկզբից մաքսատուրքերի դրույքաչափերի բարձրացմանը, որի ազդեցությունը գնաճի վրա գնահատվում է 0.1-0.4 տոկոսային կետ: Ընդհանուր առմամբ կարևորվեց 2019թ-ին իրականացվելիք հարկաբյուջետային քաղաքականության ընթացքը, որը զգալի ազդեցություն կարող է ունենալ ներքին պահանջարկի զարգացումների վրա: Խորհուրդը քննարկեց նաև ՀՀ դրամավարկային դիրքը, որը, արտաքին աշխարհում տոկոսադրույքների բարձրացման ներքո, դառնում է առավել խթանող: Այս պարագայում, գնաճի ապագա հետագծի տեսանկյունից քննարկվեցին վերաֆինանսավորման տոկոսադրույքն անփոփոխ թողնելու կամ իջեցնելու տարբերակները: ԿԲ խորհուրդը նախապատվությունը տվեց տոկոսադրույքն անփոփոխ թողնելուն՝ գնաճի վերականգնման դանդաղ հետագիծ ունենալու տեսանկյունից գործող մակարդակը գնահատելով բավարար խթանող: Վերջինս, ըստ էության, գնահատվում է ավելի արդյունավետ ուղի՝ երկրում իրական եկամուտների գնողունակության պահպանմանը և գնաճային սպասումների խարսխմանը նպաստելու համատեքստում: Դա նաև ենթադրում է, որ, կանխատեսվող մակրոտնտեսական զարգացումների պարագայում, անհրաժեշտ կլինի խթանող պայմանների առավել երկար պահպանում՝ միջնաժամկետ հատվածում գների կայունության ապահովման համար: Արդյունքում՝ ակնկալվում է, որ գնաճը դեռևս կպահպանվի ցածր մակարդակում՝ կանխատեսվող հորիզոնի վերջում կայունանալով նպատակային 4% ցուցանիշի շուրջ:

Խորհուրդն անդրադարձավ նաև առկա գնաճային ռիսկերին, որոնք առավելապես նվազման ուղղությամբ են՝ պայմանավորված թե՛ արտաքին և թե՛ ներքին գործոններով: Նշված ռիսկերի դրսևորման պարագայում ԿԲ-ն համապատասխանորեն կճշգրտի դրամավարկային քաղաքականության ուղղությունը՝ ապահովելով գների կայունությունը»:




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contac[email protected]
Яндекс.Метрика
Էջի կարգավորումներ