Ժամանակը Երևանում՝ 11:07:36,   20 Մարտ

Հայաստանում ընթացիկ տարում սուր շնչառական վարակներով հոսպիտալացվել է մոտ 700 քաղաքացի


ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: 2019 թվականի հունվարի 1-ից սուր շնչառական վարակներով  հոսպիտալացված անձանց 96 տոկոսը մինչև 4 տարեկան երեխաներ են:

«Արմենպրես»-ի հաղորդմամբ՝ այս մասին լրագրողների հետ զրույցում հայտնեց Հայաստանի Հանրապետության Առողջապահության նախարարության գլխավոր թոքաբան Անդրանիկ Ոսկանյանը՝ հավելելով, որ ընդհանուր առմամբ ընթացիկ տարում հոսպիտալացվել է 700 մարդ:

«Ստացիոնար բուժում ստացող անձանց 21 տոկոսի մոտ թոքաբորբ է ախտորոշվել:  Ես խորհուրդ կտամ ծնողներին սուր շնչառական վարակի չնչին նշանների առկայությամբ երեխաներին մանկապարտեզ և դպրոց չուղարկել, ինչը կօգնի կանխել վիրուսի տարածումը: Պետք չէ հակաբիոտիկներ ընդունել մինչև ախտորոշման հաստատվելը: Գրեթե բոլոր բակտերիաներն ու վիրուսներն «ապրում են մեզ հետ», բայց որպես հիվանդություն չեն դրսևորվում: Սառը եղանակին մարդու մոտ իմունիտետի անկում կարող է նկատվել և ընտանիքներում, որտեղ հիվանդ անձանց հետ շփում չի եղել, կարող են գրանցվել սուր շնչառական վարակները»,- ընդգծեց նա:

Բժշկի խոսքով՝ 2019 թվականին սուր շնչառական վիրուսային ինֆեկցիաներով հիվանդացության ցուցանիշը 1,5 անգամ ցածր է, քան նախորդ 2018 և 2017 թվականներին:

Ոսկանյանը շեշտեց, որ սուր շնչառական վարակների դեպքում բարդությունների զարգացման ռիսկի խմբի մեջ մտնում են նաև թոքերի օբստրուկտիվ քրոնիկական հիվանդությամբ մարդիկ:

«Այդ հիվանդությամբ մարդկանց մոտ սուր շնչառական վարակների բարդ ընթացքի դեպքում կարող է ծանր շնչառական համախտանիշ առաջանալ: Գրիպից մահացությունը պայմանավորված է ծանր շնչառական համախտանիշի զարգացմամբ, երբ բորբոքային պրոցեսը սկսվում է շնչառական համակարգից, մազանոթների և անոթային համակարգի մակարդակում: Ծանր շնչառական համախտանիշը զարգանում է նաև H1N1-ի դեպքում, հենց դրա պատճառով էլ այս վիրուսը կրողների շրջանում հաճախ գրանցվում են մահվան դեպքեր»,- ասաց ՀՀ ԱՆ գլխավոր թոքաբանը:

 

 

 

 




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ