Ժամանակը Երևանում՝ 11:07:36,   14 Հոկտեմբեր

Նախարարության փոխարեն կարող է ստեղծվել սփյուռքի հարցերով կոմիտե կամ հատուկ հանձնակատարի գրասենյակ

Նախարարության փոխարեն կարող է ստեղծվել սփյուռքի հարցերով կոմիտե կամ 
հատուկ հանձնակատարի գրասենյակ

ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: ՀՀ սփյուռքի նախարարության` սփյուռքի հետ վարվող քաղաքականության գործառույթները պահպանվելու են: Նախարարության լուծարման արդյունքում սփյուռքի քաղաքականությունը հնարավոր է մշակի սփյուռքի հարցերով կոմիտեն կամ հատուկ հանձնակատարի գրասենյակը:

«Արմենպրես»-ի հաղորդմամբ` այս մասին Ազգային ժողովում ասաց «Իմ քայլը» խմբակցության պատգամավոր, ՀՀ սփյուռքի նախկին նախարար Մխիթար Հայրապետյանը` պատասխանելով «Լուսավոր Հայաստան» խմբակցության ղեկավար Էդմոն Մարուքյանի հարցին:

Էդմոն Մարուքյանը նշեց, որ Մխիթար Հայրապետյանը սփյուռքի նախարար եղած ժամանակ միշտ շեշտադրել է նախարարության կարևորությունը, իսկ հիմա, երբ նա խորհրդարանում է, ասում է, որ նախարարությունը հնարավոր է փակվի: «Ինչպե՞ս տալ այդ ուղերձը սփյուռքին, որ վնաս չտա Հայաստան-սփյուռք հարաբերություններին»,-նշեց Մարուքյանը:

«Մենք բավականին ազնիվ ենք եղել մեր ընտրողների առաջ: Մինչ ընտրությունները դեռ Փաշինյանը խոսել էր օպտիմալացման մասին և հստակ նշել նախարարությունների կրճատման հնարավորությունը: Սփյուռքի նախարարության կարևորության մասին բազմիցս խոսել ենք, սակայն հետևյալ շեշտադրմամբ` եթե այն պահպանում ենք, ապա պետք է տանք «սուպեր լծակներ»: Լուծարման դեպքում սփյուռքի հետ քաղաքականության գործառույթները, որ  ունեցել է նախարարությունը, պահպանվելու են: Լինելու է սփյուռքի հետ քաղաքականության մշակող ու իրականացնող առանձին ինստիտուցիոնալ կառույց: Այս պահին քննարկվում է  երկու մոդել` Սփյուռքի հետ հարցերով կոմիտեի կամ կառավարության կազմում սփյուռքի հետ հարցերով հատուկ հանձնակատարի շատ մեծ գրասենյակ, որտեղ ներգրավված են լինելու նախարարության լավագույն աշխատակիցները»,-ասաց Հայրապետյանը:

Նա նշեց, որ սփյուռքի նախարարությունը փակելու մասին խոսելով` կառավարությունը  խոսում է նաև, թե դրա դիմաց ինչ է առաջարկում:

Անդրադառնալով պատասխանին` Էդմոն Մարուքյանը նկատեց, որ եթե նախարարությունը կրճատում են ու ստեղծում են կոմիտե, դա նշանակում է, որ խորհրդարանական վերահսկողության տարածքից դուրս են բերում այն: «Դրան համահունչ գերատեսչություն մնում է, սակայն մենք չենք կարող հարցեր տալ ու քաղաքական իմաստով հաշվետվություն պահանջել ինչ-որ մեկից»,-ասաց նա:

Հայրապետյանը նշեց, որ եթե լինի կոմիտե, ապա այն գործելու է ՀՀ արտաքին գործերի նախարարության ենթակայության տակ, հետևաբար քառօրյայի ամեն չորեքշաբթի օրը խորհրդարանում կառավարության անդամների հետ հարց ու պատասխանի ժամանակ հնարավորություն են ունենալու սփյուռքին վերաբերող հարցերով դիմել ՀՀ արտաքին գործերի նախարարին:

«Շատ կարևոր է, որ մենք ապահովենք գործառույթների Ժառանգականությունը:  Գործառույթները շարունակվելու են իրականացվել, որևէ մտահոգություն չկա՝ դա կիրականացվի առանձին գերատեսչությա՞ն, թե այլ ինստիտուցիոնալ մարմնի տեսքով»,-նշեց Հայրապետյանը:

Մխիթար Հայրապետյանը «Իմ քայլը» խմբակցության կողմից առաջադրված է Ազգային ժողովի Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահի պաշտոնում: Այժմ խորհրդարանում ընթանում են տասնմեկ հանձնաժողովների նախագահների ընտրության հարցի քննարկումները:

«Կառավարության կառուցվածքի եւ գործունեության մասին» օրենքում փոփոխություններ եւ լրացումներ կատարելու մասին» օրենքի մինչ այժմ հրապարակված նախագծի համաձայն՝ նոր կառավարությունը կազմված է լինելու վարչապետից, երկու փոխվարչապետից եւ նախարարներից: Կրճատվում է առաջին փոխվարչապետի պաշտոնը: Նախագծով նախատեսվում է ունենալ հետեւյալ 12 նախարարությունները.

Աշխատանքի եւ սոցիալական հարցերի նախարարություն

Առողջապահության նախարարություն

Արդարադատության նախարարություն

Արտակարգ իրավիճակների նախարարություն

Արտաքին գործերի նախարարություն

Բնապահպանության նախարարություն

Կրթության, գիտության, մշակույթի եւ սպորտի նախարարություն

Պաշտպանության նախարարություն

Տարածքային կառավարման եւ ենթակառուցվածքների նախարարություն

Բարձր տեխնոլոգիաների եւ ռազմարդյունաբերության նախարարություն

Տնտեսական զարգացման եւ գյուղատնտեսության նախարարություն

Ֆինանսների նախարարություն:




youtube

Բոլոր նորությունները    


Haypost

New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ