Ժամանակը Երևանում՝ 11:07:36,   10 Դեկտեմբեր

ԲՀԿ և ԼՀԿ պատգամավորները վեճի բռնվեցին

ԲՀԿ և ԼՀԿ պատգամավորները վեճի բռնվեցին

ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: Ազգային ժողովի նորընտիր պատգամավորներն առաջին ընդհարումն ունեցան. վեճի մասնակիցներն էին «Լուսավոր Հայաստան» խմբակցության անդամ Արման Բաբաջանյանը և «Բարգավաճ Հայաստան» խմբակցության քարտուղար Արման Աբովյանը:

«Արմենպրես»-ի փոխանցմամբ՝ նորընտիր պատգամավորների միջև ընդհարումը սկսվեց այն ժամանակ, երբ Ազգային ժողովում քննարկվում էր ԱԺ արտաքին հարաբերությունների մշտական հանձնաժողովի նախագահի ընտրության հարցը: Այս պաշտոնում առաջադրված Ռուբեն Ռուբինյանի և արտաքին քաղաքականության ոլորտի վերաբերյալ մտքերի փոխանակության ժամանակ «Լուսավոր Հայաստան» խմբակցության անդամ Արման Բաբաջանյանն իր ելույթում անդրադարձավ որոշ երկրներում Հայաստանի Հանրապետության արտակարգ և լիազոր դեսպաններին ու նրանց գործունեությանը: Քննադատական ելույթի ընթացքում չշրջանցեց նաև Ուկրաինայում Հայաստանի նախկին դեսպան Անդրանիկ Մանուկյանին:

Նախկին դեսպանի որդին՝ «Բարգավաճ Հայաստան» խմբակցության պատգամավոր Դավիթ Մանուկյանն առաջինն արձագանքեց Բաբաջանյանին՝ հորդորելով նրան չշարունակել, իսկ կրքերն ավելի թեժացան, երբ ամբիոնին մոտեցավ «Բարգավաճ Հայաստան» խմբակցության քարտուղար Արման Աբովյանը:

«Այստեղ բոլոր արտահայտությունները, որ եղան, Ուկրաինայում ՀՀ նախկին դեսպան Անդրանիկ Մանուկյանի հասցեին, բացառապես սուտ էին: Թույլ չեմ տա, որ այս ամբիոնից ապատեղեկատվություն հնչի»,- ասաց Աբովյանը:

Պատգամավորի ելույթին «Լուսավոր Հայաստան» խմբակցության ղեկավար Էդմոն Մարուքյանի արձագանքից հետո նրան պատասխանեցին «Բարգավաճ Հայաստան» խմբակցության անդամները, որից հետո բանավեճը վերածվեց լեզվակռվի:

ԱԺ նորընտիր նախագահ Արարատ Միրզոյանը, վեճը հարթելով, պատգամավորներին հորդորեց հարգել ԱԺ պատգամավորի ինստիտուտը:

«Խնդրում եմ դահլիճում պահպանել լռություն: Հերթագրվեք և ամբիոնից խոսեք։ Խնդրում եմ պահպանեք հարգանք ԱԺ պատգամավորի կարևոր ինստիտուտի նկատմամբ, միմյանց նկատմամբ ու նախագահության նկատմամբ: Հետայսու, եթե հաշիվներ պարզելու կարիք կա, պարզեք դահլիճից դուրս»,-ասաց Միրզոյանը:

7-րդ գումարման Ազգային ժողովի առաջին նստաշրջանը մեկնարկել է հունվարի 14-ին:

ՀՀ 7-րդ գումարման Ազգային ժողովում ներկայացված է քաղաքական երեք ուժ. «Իմ քայլը» դաշինք, «Բարգավաճ Հայաստան» և «Լուսավոր Հայաստան» կուսակցություններ:  ԱԺ առաջին նիստում միաձայն նախագահ ընտրվեց Արարատ Միրզոյանը: Ազգային Ժողովի 2 փոխնախագահների պաշտոնում «Իմ քայլը» խմբակցության կողմից ընտրվեցին Ալեն Սիմոնյանն ու Լենա Նազարյանը: Ընդդիմության փոխխոսնակի պաշտոնում ընտրվեց «Բարգավաճ Հայաստան» խմբակցության անդամ Վահե Էնֆիաջյանը: «Լուսավոր Հայաստան»-ը առաջադրել էր Մանե Թանդիլյանի թեկնածությունը:




youtube

Բոլոր նորությունները    


Haypost

New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ