Լենա Նազարյանի համոզմամբ` ԱԺ նախագահը նույնիսկ իր կուսակցության մրցակից ուժի համար պիտի հասանելի դարձնի կառույցի ռեսուրսները
ԵՐԵՎԱՆ, 14 ՀՈՒՆՎԱՐԻ, ԱՐՄԵՆՊՐԵՍ: Ազգային ժողովի նախագահը հանուն պետության, ընդհանուր նպատակի նույնիսկ իր կուսակցության մրցակից ուժի համար հասանելի պիտի դարձնի պետական այդ կառույցի ռեսուրսներն ու հնարավորությունները:
«Արմենպրես»-ի հաղորդմամբ`7-րդ գումարման ԱԺ առաջին նիստին ամբիոնից նման տեսակետ հայտնեց «Իմ քայլը» խմբակցության պատգամավոր Լենա Նազարյանը և շեշտեց` թեկնածու Արարատ Միրզոյանն ի զորու է դա անել:
«Ես կարծում եմ, որ Ազգային ժողովի նախագահի պաշտոնը պետք է զբաղեցնի ոչ միայն քաղաքական շատ հստակ արժեքներ ունեցող, այլ նաև դրանց մասին մինչ այս օրը արտահայտած անձը: Նախ՝ նրա համար, որ հանրությունը պետք է կարողանա հետևել խոսքից գործին անցնելուն, նաև որ չլինի ետքայլ բարձրաձայնած արժեքներից: Այս առումով Արարատ Միրզոյանի քաղաքական արժեքներն ու սկզբունքները իրավահավասարության, ժողովրդավարության վերաբերյալ միանշանակ են ու հանրահայտ: ԱԺ նախագահը պետք է պետության բարեկառուցման ընդհանուր նպատակի համար նույնիսկ իր կուսացկության մրցակից ուժերի համար հասանելի դարձնի այս պետական կառույցի ռեսուրսներն ու հնարավորությունները: Նա պետք է հոգ տանի, որ խորհրդարանը դառնա հանրային խնդիրների քննարկման իրական հարթակը»,-ասաց Նազարյանը:
Նրա կարծիքով` ԱԺ նախագահը պետք է լինի այս կարևորագույն կառույցի անկախության և ինքնավարության պաշտպանը: Նազարյանը նկատեց` Արարատ Միրզոյանի անձնային որակները` վճռականությունը, հետևողականությունն ու համարձակությունը միայն երաշխավորելու են այդ արժեքների գործադրումը ԱԺ-ում:
Պատգամավորը վստահություն հայտեց, որ Արարատ Միրզոյանը, ունենալով քաղաքական, քաղաքացիական, ԱԺ-ում աշխատելու փորձ, հրաշալի գիտակցում է այս ամենի կարևորությունն ու ի զորու է դա իրականացնել:
Ազգային ժողովի նախագահի միակ թեկնածուն «Իմ քայլը» խմբակցության կողմից առաջադրված Արարատ Միրզոյանն է:
Բաժանորդագրվեք մեր ալիքին Telegram-ում