Շարապովան 2014 թվականից ի վեր առաջին անգամ հաղթեց առանց մեկ գեյմ անգամ զիջելու
12:23, 14 Հունվար 2019
ԵՐԵՎԱՆ, 14 ՀՈՒՆՎԱՐԻ, ԱՐՄԵՆՊՐԵՍ: Ռուս թենիսիստուհի Մարիա Շարապովան 2014 թվականից հետո առաջին անգամ գերազանցեց մրցակցին՝ ոչ մի գեյմում չզիջելով հակառակորդին:
«Արմենպրես»-ի հաղորդմամբ` թենիսի Ավստրալիայի բաց առաջնության կանանց մենախաղի առաջին շրջանում Շարապովան մրցում էր Անգլիայի ներկայացուցիչ Հենրիետ Դարտի հետ: Ընդամենը 1 ժամ 03 րոպեում Շարապովան գերազանցեց մրցակցին բացարձակ 6:0, 6:0 հաշվով:
Ավստրալիայի բաց առաջնությունը թենիսի «Մեծ սաղավարտի» չորս մրցաշարից հերթականն է, որն անցկացվում է Մելբուռն քաղաքի համանուն այգու կորտերում: Մրցաշարն անցկացվում է արդեն 107-րդ անգամ: Ավստրալիայի բաց առաջնության տղամարդկանց մենախաղի գործող չեմպիոնը շվեյցարացի Ռոջեր Ֆեդերերն է, իսկ կանանց պայքարում` Կարոլին Վոզնյացկին:
Բաժանորդագրվեք մեր ալիքին Telegram-ում