ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: Սփյուռքում «Արմենպրես» լրատվական գործակալության գործունեության ընդլայնումը շատ մեծ կարևորություն ունի հայկական մեդիա դաշտում:

Այս մասին նշել է Հայաստանի ժուռնալիստների միության նախագահ Սաթիկ Սեյրանյանը՝ շնորհավորելով «Արմենպրես» պետական լրատվական գործակալության 100-ամյակի առթիվ:

«Արմենպրես»-ն իր աշխատանքը շատ բարձր պրոֆեսիոնալիզմով է կատարում, օպերատիվ կերպով տեղեկություն տրամադրում հանրությանը: Գործակալությունը նոր պլատֆորմներ է փորձարկում ու չնայած այն բանին, որ այն լրատվական գործակալություն է՝ աչքի է ընկնում իր բացառիկ նյութերով և հետաքրքիր նախագծերով»,- նշեց Սեյրանյանը:

Հայաստանի ժուռնալիստների միության նախագահը շեշտեց, որ մի շարք հայկական լրատվամիջոցներ, հատկապես վերջին տարիների ընթացքում ավելի շատ են սկսել բաժանորդագրվել «Արմենպրես»-ի նյութերին:

«Ձեր գործակալությանը մաղթում եմ, որպեսզի ավելի շատ 100-ներ բոլորի, տարեցտարի ավելանա ընթերցողների և լսարանի թիվը, նոր հարթակներ ստեղծվեն»,- ընդգծեց Սաթիկ Սեյրանյանը:

«Արմենպրես»-ը հիմնադրվել է 1918 թվականի դեկտեմբերի 18-ին, երբ Հայաստանի առաջին հանրապետության Ազգային Խորհրդի որոշմամբ ստեղծվեց նախադեպը չունեցող պետական լ րատվական` Հայկական հեռագրական գործակալությունը: Ներկայումս «Արմենպրես» լրատվական գործակալությունը գործում է որպես փակ բաժնետիրական ընկերություն: Գործակալությունն ամենահինն է Հայաստանում: Ներկա դրությամբ այն թողարկում էպաշտոնական, քաղաքական, տնտեսական, հասարակական, մարզային, տարածաշրջանային, միջազգային, մշակութային, մարզական, հարցազրույցներ, լուսանկարչական նորություններ:

«Արմենպրեսի» թիմը պահպանում է գործակալության առաջատար դերը հայաստանյան լրատվադաշտում և ամուր հիմքեր է ստեղծում տարածաշրջանային և միջազգային լրատվական հարթակներում՝ գործակալության ներկայությունն ապահովելու և զարգացնելու առումով:

Գործակալությունն ակտիվորեն լուսաբանել, հանրահռչակել և միջազգային առաջատար լրատվամիջոցներում ներկայացրել է Հայաստանի Հանրապետության համար կարևոր նշանակություն ունեցող բոլոր իրադարձությունները, հակահարված տվել ադրբեջանական քարոզչությանը, եղել և մնում է Հայոց ցեղասպանության միջազգային ճանաչման, թուրքական մերժողականության բացահայտման առաջատար դիրքերում։