«Արմենպրես»-ը միշտ պատվով է կատարել անաչառ, ճշմարտախոս լրատվամիջոցի առաքելությունը. Րաֆֆի Հովհաննիսյան
ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: «Ժառանգություն» կուսակցության հիմնադիր Րաֆֆի Հովհաննիսյանը շնորհավորական ուղերձ է հղել «Արմենպրես» լրատվական գործակալության տնօրեն Արամ Անանյանին՝ գործակալության հիմնադրման 100-րդ տարելիցի կապակցությամբ: Ինչպես հաղորդում է «Արմենպրես»-ը, ուղերձում, մասնավորապես, ասված է.
«Մեծարգո հայրենակից, Հայաստանի Հանրապետության առաջին պետական լրատվական գործակալության՝ «Արմենպրես»-ի հիմնադրման 100-ամյակի կապակցությամբ ընդունեք իմ սրտաջերմ շնորհավորանքներն ու բարեմաղթանքները Ձեզ, գործակալության ներկա և նախկին աշխատակիցներին, բոլոր ընթերցողներին: Մեկդարյա գործունեության ընթացքում «Արմենպրես»-ը միշտ պատվով է կատարել անաչառ, ճշմարտախոս լրատվամիջոցի իր ոչ դյուրին առաքելությունը՝ լուսաբանելով և միջազգայնորեն հանրահռչակելով մեր երկրի համար կարևոր նշանակություն ունեցող անցքերն ու իրադարձությունները, արդիականության ամենաթարմ նորույթները: Այսօր էլ՝ ժամանակի հրամայականին համընթաց, «Արմենպրես»-ը, շարունակում է պահպանել առաջատարի դիրքերը հայաստանյան լրատվադաշտում և արժանի տեղն աշխարհի լրատվական բազմազանության մեջ:
Հոբելյանի առթիվ ևս մեկ անգամ շնորհավորելով Ձեզ՝ մաղթում եմ արևշատություն, ստեղծագործական նորանոր նվաճումներ, իսկ գործակալությանը՝ երկարամյա կայուն ու արգասավոր ընթացք: Շնորհավոր ծնունդդ, Արմենպրես»:
Բաժանորդագրվեք մեր ալիքին Telegram-ում