«Ֆլորենս» ռեստորանային համալիրը 2019թ.-ին կներկայանա մշակութային խոշոր իրադարձություններով
ԵՐԵՎԱՆ, 17 ԴԵԿՏԵՄԲԵՐԻ, ԱՐՄԵՆՊՐԵՍ: Երևանում արդեն 7 տարի իտալական կոնցեպտով և հայկական կոլորիտով ներկայացող «Ֆլորենս» ռեստորանային համալիրը 2019թ.-ից այցելուների համար կկազմակերպի նաև մշակութային խոշոր միջոցառումներ: «Արմենպրես»-ի հետ զրույցում «Ֆլորենս»-ում կազմակերպված տարեմուտի տոնական միջոցառման ընթացքում այս մասին ասաց ռեստորանային համալիրի գլխավոր տնօրեն Մայ Անուշավանյանը:
««Ֆլորենս»-ը եկող տարվանից ներկայացնելու է մեծ մշակութային կենտրոն, չնայած, որ միշտ էլ այդպիսին է եղել, բայց այնքան շատ է եղել տոնական առիթների պահանջարկը, որ մենք չենք հասցրել համալիրը ծառայեցնել իր բուն նպատակներին: Տասնյակ հազարավոր ուրախ առիթներից զատ, կկազմակերպենք ու կներկայացնենք նաև մշակութային խոշոր իրադարձություններ»,- ասաց Անուշավանյանը:
Գլխավոր տնօրենի խոսքով` այժմ «Ֆլորենսում» կոսմետիկ վերանորոգման աշխատանքներ են ընթանում, որից հետո համալիրը նորովի կներկայանա այցելուներին:
«Կոսմետիկ վերանորոգում ենք անում, պահպանելով «Ֆլորենս»-ի մշակութային լուծումները: Մարդն, ով մուտք է գործում համալիր, միանգամից զգում է իրեն իտալական միջավայրում, այդ ամենը փորձելու ենք պահպանել: Եկող տարին «Ֆլորենս»-ում շատ հագեցած է լինելու»,- նշեց նա:
Տոնական միջոցառման ընթացքում վառվեցին ռեստորանային համալիրի ամանորյա լույսերը, ազդարարվեց տարեշրջանի փակումը: Իսկ մինչ այդ տեղի ունեցավ 2019թ.-ի գարնանը շահագործվելիք «Ֆլորենս Գյումրի»-ի շնորհանդեսը:
«Որոշվեց, որ պետք է «Ֆլորենս»-ի մասնաճյուղը բացվի Գյումրիում, որը ճանաչելի կդարձնենք աշխարհին, որովհետև մենք տուրիստական կազմակերպությունների ու միջազգային կազմակերպությունների հետ նույնպես աշխատելու ենք: Այն կշահագործվի Գյումրիում առկա 19-րդ դարի կառույցներից մեկում, որն իր պատմության ընթացքում տեսել է երկու երկրաշարժ և մեկ հրդեհ: Որոշել ենք նաև, որ ողջ անձնակազմը լինելու է Գյումրիից: Ովքեր ունեն տաղանդ, թեկուզ չունեն աշխատանքային փորձ, կարող են մեզ մոտ աշխատելով ձեռք բերել այդ փորձը: Գրեթե 40 աշխատատեղ կունենանք Գյումրիում հենց գյումրեցիների համար»,- ասաց «Ֆլորենս Գյումրի»-ի տնօրեն Կարեն Հարությունյանը:
Տոնական միջոցառման ընթացքում այցելուներն ու հյուրերը համտեսեցին ռեստորանային համալիրի կողմից պատրաստված շոկոլադե կոնֆետները:
Բաժանորդագրվեք մեր ալիքին Telegram-ում