ԵՐԵՎԱՆ, 14 ԴԵԿՏԵՄԲԵՐԻ, ԱՐՄԵՆՊՐԵՍ: ԱՄՆ-ի Սենատը քվեարկել Է Եմենի հակամարտությունում Սաուդյան Արաբիային ցույց տրվող ռազմական օգնությունը դադարեցնելու օգտին՝ լրագրող Ջամալ Խաշկոջիի սպանության պատճառով: Օրենսդիրների ընդունած բանաձեւում սպանության մեղքը բարդվում Է Սաուդյան Արաբիայի գահաժառանգ արքայազն Մուհամեդ իբն Սալման ալ Սաուդի վրա:

Եվս մեկ փաստաթուղթ ԱՄՆ-ի նախագահին կոչ Է անում հանելու զորքերը Եմենից, տեղեկացնում Է «Արմենպրես»-ը՝ հղում անելով BBC-ին: 56 սենատորներ քվեարկել են Եմենի վերաբերյալ բանաձեւի օգտին, դեմ են եղել 41 սենատորներ:

Բանաձեւը խորհրդատվական բնույթ Է կրում եւ կարող Է արգելափակվել նախագահի կողմից: Դոնալդ Թրամփն ասել Է, որ պատրաստվում Է արգելափակել այն: Փաստաթուղթը հազիվ թե հաստատվի ԱՄՆ-ի Կոնգրեսի Ներկայացուցիչների պալատի կողմից: Հաշվի առնելով դա՝ դիտորդներն այն որակում են «խորհրդանշական բողոք» Թրամփի դիրքորոշման դեմ: