Երկու ՔԿՀ-ի կառուցումը կարող է լուծել դատապարտյալների պահման խնդիրները. Քրմոյան
ԵՐԵՎԱՆ, 13 ԴԵԿՏԵՄԲԵՐԻ, ԱՐՄԵՆՊՐԵՍ: Մեկ խոշոր քրեակատարողական հիմնարկի կառուցումը Երևանում և ևս մեկի կառուցումը՝ Գորիսի ՔԿՀ-ին փոխարինելու համար, կլուծի դատապարտյալների պահման խնդիրները:
«Արմենպրես»-ի հաղորդմամբ՝ այս մասին լրագրողների հետ զրույցում ասաց ՀՀ արդարադատության նախարարի տեղակալ Սուրեն Քրմոյանը:
ՔԿՀ-ներում հասարակական վերահսկողություն իրականացնող հասարակական դիտորդների խումբը դիտարկումներ է իրականացրել Նուբարաշենի, Գորիսի և Արթիկի ՔԿՀ-ներում:
«Լուսանկարներ են արվել տվյալ ՔԿՀ-ներում, որտեղ երևում են վատ պայմանները: Հիմնական լուսանկարներն արվել են 2017 թվականին: Գորիսի բուժմասն, օրինակ, արդեն իսկ վերանորոգվել է: Կառավարությունն այս տարի 280 մլն դրամ է հատկացրել ՔԿՀ-ում վերանորոգումների համար: Գարշահոտության հարցը Նուբարաշենում մասամբ լուծվել է և դեռ կլուծվի: Այս խնդրի վերջնական լուծումը նոր քրեակատարողական հիմնարկի կառուցումն է»,- նշեց Քրմոյանը:
Նա ընդգծեց, որ մեծ ծավալով աշխատանքներ են կատարվել պահման պայմանները բարելավելու ուղղությամբ, բայց սակայն դրանք չի կարելի համեմատել միջազգային ստանդարտներ ունեցողների հետ:
Բաժանորդագրվեք մեր ալիքին Telegram-ում