Ժամանակը Երևանում՝ 11:07:36,   17 Փետրվար

Ժողովրդավարական երկրները Հայաստանին ընդունելու են որպես շատ ավելի բարձր վարկանիշով պետություն. Գարիկ Քեռյան

Ժողովրդավարական երկրները Հայաստանին ընդունելու են որպես շատ ավելի բարձր 
վարկանիշով պետություն. Գարիկ Քեռյան

ԵՐԵՎԱՆ, 10 ԴԵԿՏԵՄԲԵՐԻ, ԱՐՄԵՆՊՐԵՍ: ԵՊՀ միջազգային հարաբերությունների ֆակուլտետի քաղաքական ինստիտուտների և գործընթացների ամբիոնի վարիչ, քաղաքագետ Գարիկ Քեռյանի համար արտահերթ խորհրդարանական ընտրությունների արդյունքներն անակնկալ չէին: Նրա խոսքով՝ «Իմ քայլը» դաշինքի հաղթանակը ոչ ոք չէր վիճարկում, իսկ թե ով կանցներ խորհրդարան, հիմնականում պարզ էր:

«Ապագա խորհրդարանը խիստ բևեռացված չի լինելու, չենք ունենալու արմատական քաղաքական գիծ ունեցող միմյանց դեմ ուժեր: «Իմ քայլը» դաշինքի նկատմամբ բավական լոյալ են տրամադրված և՛ «Բարգավաճ Հայաստան», և՛ «Լուսավոր Հայաստան» կուսակցությունները: Իհարկե, «Լուսավոր Հայաստանը» նշում էր, որ կլինի ընդդիմադիր քաղաքական ուժ, բայց, ամեն դեպքում, այն իշխող ուժի հետ գործել է «Ելք» դաշինքով, ողջունել է հեղափոխությունը, և սուր  քննադատությամբ երբեք հանդես չի եկել ընդդեմ «Քաղաքացիական պայմանագիր» կուսակցության: Ես լրիվ ընդունում եմ, որ այն կարող է լինել ընդդիմություն, բայց՝ ոչ արմատական»,-ասաց  Գարիկ Քեռյանը:

Քաղաքագետը նշեց, որ այս ընտրություններն առանձնանում էին ազատ, արդար լինելով: Նրա խոսքով, Երևանի ավագանու և խորհրդարանական արտահերթ ընտրությունների այդ մակարդակով անցկացումը մեծ նվաճում էր:

«Միանշանական պարզ է, որ ժողովրդավարական երկրները Հայաստանին ընդունելու են որպես շատ ավելի բարձր վարկանիշով պետություն, որովհետև Հայաստանում ընտրությունները դիտարկվում են ազատ, արդար: Հայաստանն իրենց հետ հարաբերվելու է լեգիտիմ իշխանության, ժողովրդավարական երկրի իմիջով: Սա ես համարում եմ մեծ դրական քայլ, որն իր ազդեցությունը կարող է թողնել արցախյան հարցում առաջընթաց ունենալու համար»,-ասաց Գարիկ Քեռյանը:

Խոսելով խորհրդարան չանցած քաղաքական ուժերից՝  Գարիկ Քեռյանը նշեց, որ ամիսներ առաջ ստեղծված և ընտրություններին 1 տոկոս ձայն հավաքած կուսակցություններն առաջիկայում լուրջ անելիք ունեն: Քաղաքագետի խոսքով, եթե նրանք ունենան բավարար քաղաքական կամք, ապա հինգ տարվա ընթացքում կաշխատեն քաղաքական գործընթացներում կայանալ: Ինչ վերաբերում է տարիների փորձ ունեցող քաղաքական ուժերին, որոնք չհաղթահարեցին անցողիկ շեմը, ապա Գարիկ Քեռյանը նշեց, որ այստեղ լուրջ փոփոխությունների անհրաժեշտություն կա:

«Այստեղ լուրջ մտածելու բան կա ռե-բրենդինգի առումով: Եթե այդ քաղաքական ուժերը առաջիկա տարիներին շարունակեն նույն քաղաքական կուրսով և դիմագծով, նույն լիդերներով, ապա հաջորդ ընտրություններին այս 2-3 տոկոսն էլ չեն ունենա: Իհարկե, ամեն ինչ կախված է, թե ինչ հաջողություն կունենա ներկա իշխանությունն արցախյան հակամարտության կարգավորման գործընթացում և սոցիալական վիճակի բարելվաման առումով: Այդ ամեն ինչը կազդի և արտախորհրդարանական ընդդիմադիր ուժերի վարկանիշի և իշխող կուսակցության վարկանիշի վրա»,-հավելեց քաղաքագետը:

Կենտրոնական ընտրական հանձնաժողովի նախնական տվյալներով՝ կուսակցությունների ու կուսակցությունների դաշինքների միջև ընտրողների քվեները բաշխվել են հետևյալ կերպ.

Հայաստանի Հանրապետական կուսակցությունը ստացել է 4,7 տոկոս կամ 59068 ձայն, «Քաղաքացու որոշում» սոցիալ դեմոկրատական կուսակցությունը` 0,68 տոկոս կամ 8533  ձայն, Հայ հեղափոխական դաշնակցությունը` 3,89 տոկոս կամ 48822 ձայն, «Իմ քայլը» դաշինքը` 70,44 տոկոս կամ 884849 ձայն, «Լուսավոր Հայաստան» կուսակցությունը` 6,37 տոկոս կամ 80049 ձայն, «Քրիստոնեա-ժողովրդական վերածնունդ» կուսակցությունը` 0,51 տոկոս կամ 6460 ձայն, «Ազգային առաջընթաց» կուսակցությունը` 0,33 տոկոս կամ 4122 ձայն, «Մենք» դաշինքը` 2 տոկոս կամ 25174 ձայն, «Օրինաց երկիր» կուսակցությունը` 0,99 տոկոս կամ 12390 ձայն, «Սասնա ծռեր» համահայկական կուսակցությունը` 1,82 տոկոս կամ 22868 ձայն, «Բարգավաճ Հայաստան» կուսակցությունը` 8,27 տոկոս կամ 103837 ձայն:





https://zen.yandex.ru/id/5dee07a31e8e3f00ae3051c1
Tokyo 2020
youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]menpress.am
settings Էջի կարգավորումներ