Արամ Սարգսյանը խորհրդարանական արտահերթ ընտրությունների նախընտրական քարոզարշավը իր մասնակցած բոլոր ընտրություններից լավագույնն է համարում
ԵՐԵՎԱՆ, 9 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ Ազգային ժողովի արտահերթ ընտրությունների նախընտրական քարոզարշավը հավասար հնարավորություններ է ստեղծել քարոզիչների համար:
«Արմենպրես»-ի հաղորդմամբ՝ լրագրողների հետ զրույցում, այս մասին ասաց «Մենք» կուսակցությունների դաշինքի ցուցակը գլխավորող Արամ Զավենի Սարգսյանը:
«Իմ մասնակցած ընտրությունների լավագույն քարոզարշավն էր՝ քարոզիչների հավասարության և հնարավորությունների առումով»,- նշեց Սարգսյանը և կատակելով հավելեց, որ միակ թերությունը, որից անընդհատ բողոքել է, կարճ ժամանակն է եղել:
Արտահերթ խորհրդարանական ընտրություններին մասնակցում է 11 քաղաքական ուժ՝ 9 կուսակցություն և 2 դաշինք: Մասնակցող ուժերն են՝ Հայաստանի Հանրապետական կուսակցությունը, «Քաղաքացու որոշում» սոցիալ-դեմոկրատական կուսակցությունը, «Հայ Յեղափոխական Դաշնակցություն» կուսակցությունը, «Իմ քայլը» կուսակցությունների դաշինքը, «Լուսավոր Հայաստան» կուսակցությունը, «Քրիստոնեա-ժողովրդական վերածնունդ» կուսակցությունը, «Ազգային առաջընթաց» կուսակցությունը, «Մենք» դաշինքը, «Օրինաց Երկիր» կուսակցությունը, «Սասնա ծռեր» կուսակցությունը և «Բարգավաճ Հայաստան» կուսակցությունը:
Բաժանորդագրվեք մեր ալիքին Telegram-ում