Ժամանակը Երևանում՝ 11:07:36,   22 Մարտ

Զոհրաբ Մնացականյանն ընդունեց Եվրոպական խորհրդարանի դիտորդական առաքելության անդամներին


ԵՐԵՎԱՆ, 9 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի արտաքին գործերի նախարարի պաշտոնակատար Զոհրաբ Մնացականյանը դեկտեմբերի 8-ին ընդունեց Հայաստանում կայանալիք խորհրդարանական ընտրություններին հետևելու նպատակով Երևան ժամանած Եվրոպական խորհրդարանի դիտորդական պատվիրակությանը՝ Եվրախորհրդարանի փոխնախագահ Հեիդի Հաուտալայի գլխավորությամբ:

Ինչպես «Արմենպրես»-ին տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից, Հայաստանի արտաքին քաղաքական գերատեսչության ղեկավարը ներկայացրեց Հայաստանի վերջին ներքաղաքական զարգացումները՝ ընդգծելով, որ ժողովրդի կողմից կառավարությանը տրված լայն մանդատի գերակա ուղղություններն էին արդարադատության, օրենքի գերակայության ամրապնդումը, սոցիալ-տնտեսական ոլորտում հավասար հնարավորությունների երաշխավորումը: Որպես կարևոր հնագրվան՝ Հայաստանի ԱԳ նախարարի պաշտոնակատարն առանձնացրեց ժողովրդի կամքն արտահայտող և միջազգային չափանիշներին համապատասխան խորհրդարանական ընտրությունների անցկացումը:

Հյուրերի խնդրանքով՝ նախարարի պաշտոնակատար Մնացականյանը ներկայացրեց Հայաստանի կառավարության արտաքին քաղաքական օրակարգի հիմնական ուղղություններն ու առաջնահերթությունները, որոնց հիմքում ընկած է շարունակականության սկզբունքը՝ ուղղված Հայաստանի ազգային շահի պաշտպանությանը:

Հայաստանի ԱԳՆ ղեկավարը և Եվրոպական խորհրդարանի դիտորդական պատվիրակության անդամները մտքեր փոխանակեցին Հայաստանի և Եվրոպական Միության հարաբերությունների օրակարգային հարցերի շուրջ։ ԵՄ անդամ երկրների հետ երկկողմ և բազմակողմ ձևաչափերով տարբեր բնագավառներում փոխգործակցության զարգացման համատեքստում կարևորվեց Համապարփակ և ընդլայնված գործընկերության համաձայնագիրը։

Հանդիպմանն անդրադարձ կատարվեց տարածաշրջանային և միջազգային օրակարգի մի շարք հրատապ հարցերի:

Զոհրաբ Մնացականյանը զրուցակիցներին ներկայացրեց ղարաբաղյան հիմնախնդրի հանգուցալուծման գործընթացում Հայաստանի դիրքորոշումն ու մոտեցումները՝ վերահաստատելով հայկական կողմի հանձնառությունը ԵԱՀԿ Մինսկի խմբի համանախագահության շրջանակներում հիմնախնդրի բացառապես խաղաղ կարգավորմանը:




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ