Կառավարությունը երկարաձգեց «Արթիկի ՓՀԿ» ՍՊԸ-ի կողմից ներմուծվող ապրանքների ԱԱՀ-ի գումարների վճարման ժամկետը
ԵՐԵՎԱՆ, 6 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ կառավարությունը 3 տարով երկարաձգեց «Արթիկի ՓՀԿ» ՍՊԸ-ի կողմից ապրանքների ներմուծման ԱԱՀ-ի գումարների վճարման ժամկետը:
«Արմենպրես»-ի փոխանցմամբ՝ այսպիսի որոշում կայացվեց ՀՀ կառավարության դեկտեմբերի 6-ին կայացած հերթական նիստում:
«Ներդրումային ծրագրի շրջանակում ընկերությունը նախատեսում է Շիրակի մարզի Մարալիկ քաղաքում զբաղվել տեքստիլի արտադրությամբ՝ թել և բժշկական բամբակ, ինչպես նաև կտորների թափվածքների վերամշակմամբ։ Ծրագրի շրջանակում ընկերությունը մտադիր է կատարել ընդհանուր շուրջ 6 մլրդ դրամի չափով ներդրում, որից բարձրորակ հումք և այլ ապրանքներ ձեռք բերելու համար ներդրում կկատարի շուրջ 4,26 մլրդ ՀՀ դրամի չափով»,- ասաց Տնտեսական զարգացման և ներդրումների նախարարի պաշտոնակատար Տիգրան Խաչատրյանը:
Ընկերությունում երեք տարվա ընթացքում կստեղծվի 160 նոր աշխատատեղ` 185 հազար դրամ միջին աշխատավարձով:
Բաժանորդագրվեք մեր ալիքին Telegram-ում