ԵՐԵՎԱՆ, 6 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ կառավարությունը 3 տարով երկարաձգեց «Ռադ Սանե Վաշամիր Գրուպ» ՍՊԸ-ի կողմից ապրանքների ներմուծման ԱԱՀ-ի գումարների վճարման ժամկետը:

«Արմենպրես»-ի փոխանցմամբ՝ այսպիսի որոշում կայացվեց ՀՀ կառավարության դեկտեմբերի 6-ի նիստում:

«Ընկերությունը Վանաձորում կառուցվող կոմպոզիտային գազաբալոնների արտադրության գործարանի ծրագրի շրջանակում ներկրվող ապրանքների համար 1,1 մլրդ դրամ ԱԱՀ-ի գումարների վճարման ժամկետը ևս 3 տարով երկարաձգելու համար արտոնության է դիմել: Մեկնարկած ծրագրի շրջանակում ընկերությունը նպատակադրված է կատարել շուրջ 11,1 մլրդ դրամի ներդրում, որը պետք է իրականացնի մի քանի փուլերով։ Առաջին փուլով ընկերությունը արտոնություն էր ստացել 1,1 մլրդ ՀՀ դրամի չափով, երկրորդ փուլի շրջանակում նախատեսվում է ներմուծել ևս 1 մլրդ դրամի չափով հումք և այլ ապրանքներ»,- ասաց Տնտեսական զարգացման և ներդրումների նախարարի պաշտոնակատար Տիգրան Խաչատրյանը:

 Ներդրումային ծրագրի իրագործման արդյունքում ընկերությունում երեք տարվա ընթացքում կստեղծվի 112 նոր աշխատատեղ` 160 հազար դրամ միջին աշխատավարձով: