Թուրքիան սաուդացի լրագրողի սպանության գործի միջազգային հետաքննություն նախաձեռնելու պատրաստակամություն է հայտնել
ԵՐԵՎԱՆ, 5 ԴԵԿՏԵՄԲԵՐԻ, ԱՐՄԵՆՊՐԵՍ: Թուրքիայի արտաքին գործերի նախարար Մևլութ Չավուշօղլուն հերթական անգամ անդրադարձել է սաուդացի ընդդիմադիր լրագրող Ջամալ Խաշոկջիի սպանության գործին: Այս մասին, ինչպես հաղորդում է «Արմենպրես»-ը, հայտնում են թուրքական ԶԼՄ-ները:
Թուրքիայի ԱԳ նախարարը նշել է, որ Թուրքիան պատրաստ է սպանության գործի բացահայտման հետ կապված դժվարությունների առկայության պարագայում նախաձեռնել դրա միջազգային հետաքննությունը:
«Խաշոկջիի սպանության հետաքննությունը ընթացքի մեջ է, և մենք պատրաստ ենք ավարտին հասցնել այն: Եթե հետաքննության գործում դժվարություններ առաջանան, մենք կնախաձեռնենք միջազգային հետաքննություն»,- Բրյուսելում հայտարարել է Թուրքիայի արտգործնախարարը:
Չավուշօղլուն նշել է, որ գործի բացահայտման համար շատ կարևոր է սաուդական կողմի անկեղծությունը:
«Հետաքննության գործում Սաուդյան Արաբիան պետք է անկեղծ լինի Թուրքիայի և ողջ միջազգային հանրության առջև»,- շեշտել է Չավուշօղլուն:
Ստամբուլի գլխավոր դատախազությունը սաուդացի ընդդիմադիր լրագրող Ջամալ Խաշոկջիի գործով պահանջել է ձերբակալել Սաուդյան Արաբիայի գահաժառանգի խորհրդականին և երկրի հետախուզության պետի նախկին տեղակալին:
Թուրքական ԶԼՄ-ներում տարածված տեղեկության համաձայն՝ Սաուդյան Արաբիայի արքայազն Մուհամեդ բին Սալման ալ Սաուդի խորհրդական Սաուդ ալ Քահթանին գլխավորել է ընդդիմադիր լրագրողի սպանությունն իրականացրած 18 հոգանոց հանցավոր խումբը:
Սաուդյան Արաբիայի հետախուզության պետի նախկին տեղակալ գեներալ Ահմեդ ալ Ասիրին էլ այն անձն է, ով իր երկրի իշխանությունների կողմից մեղադրվում է լրագրողի սպանության համար:
Սաուդյան Արաբիայի իշխանությունների առաջ քաշած վարկածի համաձայն՝ Խաշոկջիի սպանությունը տեղի է ունեցել հենց Ալ Ասիրիի կողմից պաշտոնական դիրքի և լիազորությունների չարաշահման և իշխանությունների հրամանը սխալ կատարելու հետևանքով:
Բաժանորդագրվեք մեր ալիքին Telegram-ում