Դեկտեմբերի 5-ին սպասվող իրադարձությունները
ԵՐԵՎԱՆ, 5 ԴԵԿՏԵՄԲԵՐԻ, ԱՐՄԵՆՊՐԵՍ: «Արմենպրես» պետական լրատվական գործակալությունը ներկայացնում է այսօր սպասվող իրադարձությունները:
ԵԱՀԿ համանախագահների միջնորդությամբ այսօր՝ դեկտեմբերի 5-ին, Միլանում տեղի է ունենալու Հայաստանի արտաքին գործերի նախարարի պաշտոնակատար Զոհրաբ Մնացականյանի և Ադրբեջանի արտաքին գործերի նախարար Էլմար Մամեդյարովի հանդիպումը:
Դեկտեմբերի 7-8-ը Գյումրիում անցկացվելու է «Մարզերի հզորացումը բարձր տեխնոլոգիաների խթանմամբ» երկրորդ համաժողովը: Միջոցառմանն ընդառաջ ՀՀ տրանսպորտի, կապի և տեղեկատվական տեխնոլոգիաների նախարարությունում այսօր նախատեսված ասուլիսում կներկայացվեն մանրամասներ:
«Զանգակ» գրատանը նախատեսված է «Իմ քայլը» դաշինքի համամասնական ցուցակով պատգամավորության թեկնածու, ՀՀ ԿԳ նախարարի պաշտոնակատար Արայիկ Հարությունյանի ասուլիսը։ «Սասնա Ծռեր» համահայկական կուսակցությունը Ժիրայր Սեֆիլյանի և Արա Պապյանի ուղեկցությամբ իր քարոզչությունը կիրականացնի Վայոց ձորում և Սյունիքում: «Լուսավոր Հայաստան» կուսակցության ամբողջական տասնյակը և թիմը Էդմոն Մարուքյանի գլխավորությամբ քարոզարշավը կմեկնարկեն Մալաթիա-Սեբաստիա վարչական շրջանի Շահումյանի այգուց։ Լրագրողների հետ կհանդիպի նաև ՀՀԿ ցուցակով ԱԺ պատգամավորի թեկնածու Գագիկ Մինասյանը:
Ամերիկյան համալսարանի «Յակոբեան» բնապահպանական կենտրոնը կազմակերպում է «Հայաստանում թափոնների կառավարման քաղաքականություն և ռազմավարություն» եռօրյա մեկնարկային աշխատաժողով: Բացման խոսքով հանդես կգա ՀՀ վարչապետի գլխավոր խորհրդական Արսեն Գասպարյանը և այլք:
Կկայանա Հայաստանում ՌԴ առևտրային ներկայացուցիչ Անդրեյ Բաբկոյի ամփոփիչ ասուլիսը: Նա կներկայացնի տարվա արդյունքները:
Հայաստանի ազգային պատկերասրահը կբացվի «Բեռնինիի դպրոց. հռոմեական բարոկկո» ցուցահանդեսը: Ցուցադրությունը ներկայացնում է Արիչչա քաղաքի Պալացցո Կիջիի թանգարանում պահվող բարոկկո ոճի 55 բարձրարվեստ նմուշներ:
Այս և այլ թեմաների մասին կարող եք մանրամասն ընթերցել armenpress.am կայք էջում: Հետևեք մեզ նաև թվիթերում և ֆեյսբուքում:
Բաժանորդագրվեք մեր ալիքին Telegram-ում