ԳԱՎԱՌ, 3 ԴԵԿՏԵՄԲԵՐԻ, ԱՐՄԵՆՊՐԵՍ: Գեղարքունիքի մարզի Գեղհովիտ գյուղում տեղական բյուջեի միջոցներով եւ ՀՀ կառավարության կողմից տրամադրված սուբվենցիայով կապիտալ նորոգման է ենթարկվել երկու թաղամասերը սնուցող ոռոգման համակարգի գլխամասային կառույցը, որը փլվել էր այս տարվա գարնանային հեղեղումներից՝ ոռոգման շրջանում անելանելի վիճակ ստեղծելով ավելի քան 500 տնտեսությունների համար:
Ինչպես «Արմենպրես»-ին տեղեկացրեց Գեղհովիտի գյուղապետ Վարդան Պողոսյանը, վնասված գլխամասային կառույցի կապիտալ նորոգման նախագծային արժեքը կազմել է 17 միլիոն 138 հազար դրամ, սակայն շինարարական մրցույթը շահվել է 10 միլիոն 562 հազար դրամով: Գեղհովիտի համայնքապետարանը հատկացրել է 8 միլիոն դրամ: 2 միլիոն 562 հազար դրամ էլ կազմել է ՀՀ կառավարության տրամադրած սուբվենցիան: Շինարարական աշխատանքները մեկնարկել են հոկտեմբերին եւ ավարտվել դեկտեմբերի 3-ին:
«Ոռոգման շրջանում գյուղի «Ղռաջներ» եւ «Չայիրներ» թաղամասերի ավելի քան 500 տնտեսությունները մեծ դժվարություններ կրեցին, քանի որ ոռոգման ջրատարի գլխամասային հատվածը գարնանային վարարումների հետեւանքով փլվել էր: Փլված գլխամասային կառույցի կապիտալ նորոգումը մեզ համար դարձել էր առաջնահերթ խնդիր: Մոտ 70 գծամետր երկարությամբ եւ 2,5 մետր բարձրությամբ գաբիոնապատվեց գլխամասային կառույցը, որն արդեն եկող տարվանից կարող է անխափան ոռոգման ջուր մատակարարել գյուղի տնտեսություններին՝ ապահովելով ավելի քան 200 հեկտար տարածքի կանոնավոր ոռոգումը»,-նշեց համայնքի ղեկավարը:

Խոսրով Խլղաթյան