ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Թուրքիայի արտաքին գործերի նախարար Մևլութ Չավուշօղլուն կարծում է, որ սաուդացի լրագրող Ջամալ Խաշոկջիի մարմինը մասնատել են երաժշտության ներքո:

 Այս մասին, ինչպես հաղորդում է «Արմենպրես»-ը, Թուրքիայի ԱԳՆ-ն հայտնել է Suddeutsche Zeitung թերթի հետ զրույցում:

 «Նրան սպանել են 7 րոպեի ընթացքում: Դա կանխամտածված սպանություն է եղել: Դուք կարող եք ձայնագրության մեջ լսել, թե ինչպես է դատաբժիշկը հրահանգում մյուսներին: Նրանք պետք է երաժշտություն լսեին՝ մինչ մասնատում էին դիակը: Կարելի է նկատել, որ նա վայելում է այդ պահը»,-թերթի հետ զրույցում ասել է Չավուշօղլուն:

 Թուրքիայի արտգործնախարարը նշել է, որ, ըստ իրենց, այդ նպատակով Թուրքիա ժամանած մարդիկ չէին կարող ինքնուրույն գործել:

«Մենք մտածում ենք, որ մարդիկ, ովքեր այդ գործի համար եկել էին Թուրքիա չէին կարող ինքնուրույն գործել: Նրանք չէին համարձակվի: Ամեն դեպքում առանց ապացույցների ես չեմ կարող ոչինչ ասել»,-նշել է նախարարը:

 Մամուլում հոկտեմբերի 3-ին լուրեր տարածվեցին, որ սաուդացի ընդդիմադիր լրագրող Ջամալ Խաշոկջին Ստամբուլում Սաուդյան Արաբիայի գլխավոր հյուպատոսություն մտնելուց հետո անհետացել է:

Շաբաթներ անց պարզվեց, որ լրագրողը սպանվել է հյուպատոսարանի շենքում:

Նախնական վարկածների համաձայն՝ լրագրողը սպանվել է Սաուդյան Արաբիայի թագաժառանգի պատվերով: