Երևանում մարվեց «Պոլսի «Ժամանակ» օրաթերթ»-ի թեմային նվիրված նամականիշ
ԵՐԵՎԱՆ, 22 ՆՈՅԵՄԲԵՐԻ, ԱՐՄԵՆՊՐԵՍ: «Պոլսի «Ժամանակ» օրաթերթի» թեմային նվիրված՝ նոյեմբերի 22-ին, նոր նամականիշ մարվեց և շրջանառության մեջ դրվեց:
«Արմենպրես»-ի հաղորդմամբ՝ նամականիշի անվանական արժեքը լինելու է 100 ՀՀ դրամ:
Այն տպագրվել է Ֆրանսիայի «Cartor» տպագրատանը՝ 30 հազար տպաքանակով: Նամականիշի դիզայնի հեղինակն է «ՀայՓոստ» ՓԲԸ-ի դիզայներ Դավիթ Դովլաթյանը:
Փոստային նամականիշի վրա պատկերված են «Ժամանակ» օրաթերթի հիմնադիրներ Միսակ և Սարգիս Գոչունյան եղբայրները: Նամականիշի վրա նաև ներկայացված են օրաթերթի հին շենքն ու լոգոտիպը:
Օրաթերթի գլխավոր խմբագիր Արա Գոչունյանն ասաց, որ այս նամականիշի թողարկումը նվիրված է հրատարակության 111-րդ տարեդարձին:
«Մամուլն ու նամականիշները շատ հետաքրքիր խորհուրդ ունեն՝ երկուսն էլ շրջանառվում են ամբողջ աշխարհով մեկ»,- նշեց Գոչունյանը:
Նա «ՀայՓոստ» ՓԲԸ-ի խորհրդի նախագահ Խուան Պաբլո Գեչիջյանին նվիրեց «Ժամանակ»-ի հիմնադիր Միսակ Գոչունյանի «Օրվան մտածումներ» ժողովածուն:
ՀՀ տրանսպորտի, կապի և տեղեկատվական տեխնոլոգիաների փոխնախարար Արմեն Արզումանյանն ընդգծեց, որ «Ժամանակ»-ը ժամանակի մեջ… չի կորցրել իր դիմագիծը:
«Այսքան տարի շարունակ Պոլսում պահելով այդ դիմագիծը՝ շատ կարևոր աշխատանք եք արել և անում»,- ասաց Արզումանյանը:
«Ժամանակ» օրաթերթը Ստամբուլում լույս է տեսնում 1908 թվականի հոկտեմբերի 28-ից և հայ աշխարհի ամենահին օրաթերթն է, որն առանց ընդհատումների շարունակում է տպագրվել:
Բաժանորդագրվեք մեր ալիքին Telegram-ում